ԵՐԵՎԱՆ, 28 մարտի — Sputnik. Խորհրդարանական ընտրապայքարին մասնակցող քաղաքական ուժերն իրենց նախընտրական ծրագրերում առավել մեծ տեղ են հատկացնում սոցիալական և տնտեսական հացերին, մինչդեռ ԼՂ հիմնահարցի լուծումը նրանց ծրագրերում երկրորդական թեմա է: Այսօր Sputnik Արմենիա մամուլի կենտրոնում, լրագրողերի հետ հանդիպմանը նման կարծիք հայտնեց «Մոդուս վիվենդի» վերլուծական կենտրոնի ղեկավար, քաղաքագետ Արա Պապյանն ու Լարիսա Ալավերդյանը:
Նրանց դիտարկմամբ` քաղաքական ուժերից միայն Կոնգրես-ՀԺԿ դաշինքն է իր նախընտրական ծրագրերում առաջնահերթ թեմա դարձրել Լեռնային Ղարաբաղի խնդիրը` չբացելով, սակայն, իրական փակագծերը:
Ղարաբաղյան հարցի շուրջ որոշակի տեսլական ներկայացված է նաև «Ազատ դեմոկրատների» և ՀՅԴ նախընտրական ծրագրերում:
Քաղաքական մյուս ուժերի նախընտրական ծրագրերում Արցախի հիմնահարցի լուծման թեման ներկայացված է ընդհանուր ձևակերպումներով կամ, ինչպես Լարիսա Ալավերդյանն է նկատում, տպավորություն է ստեղծվում, որ այս հարցի մասին ծրագիր կազմողներն ընդհանրապես մոռացել են և վերջում ուղղակի մեկ տողով լրացրել բացթողումը:
