ԵՐԵՎԱՆ, 27 մարտի — Sputnik, Լաուրա Սարգսյան. Քվեարկության ժամանակ մատնահետքեր չեն թողնի նրանք, ովքեր գտնվում են հիվանդանոցներում և ստացիոնար բուժում են անցնում, այդ թվում նաև զինվորական հոսպիտալներում, ինչպես նաև Հայաստանից դուրս գտնվող դիվանագետները, նրանց ընտանիքի անդամները, զինծառայողները։ Ստացիոնար բուժում անցնող քաղաքացիները կքվեարկեն ապրիլի 2-ին շրջիկ արկղի օգնությամբ, իսկ նրանք, ովքեր երկրից դուրս են գտնվում, արդեն հասցրել են իրենց քաղաքացիական պարտքը կատարել։
«Էլեկտրոնային քվեարկությունը սկսվել է մարտի 24-ին ժամը 08:00 և ավարտվել մարտի 26-ին ժամը 20.00-ին։ Ընտրողների ուղարկվել էր ընտրակարգն ու կոդը, որով նրանք միացել են ԿԸՀ-ի կայքի ընտրությունների ավտոմատացված համակարգին», — Sputnik Արմենիայի թղթակցի հետ զրույցում ասաց ԿԸՀ-ի քարտուղար Արմեն Սմբատյանը։
Էլեկտրոնային քվեարկությանը 877 ՀՀ քաղաքացուց, մասնակցել է 747-ը։ Սմբատյանը պարզաբանեց, որ էլեկտրոնային քվեարկության արդյունքները կամփոփվեն ապրիլի 2-ին։ Ընդ որում, էլեկտրոնային քվեարկությանը մասնակցած քաղաքացիները կկարողանան քվեարկել միայն կուսակցական համակարգով։
Ընտրողների շարքում այս անգամ նաև արտերկրում գտնվող զինծառայողներ են, որոնք երկար ժամանակ մեկնել են գործուղման կամ ուսում ստանալու։
