ԵՐԵՎԱՆ, 27 մարտի — Sputnik. ԵՏՄ անդամ հանդիսացող Հայաստանն ու Ղրղըզստանը ոչ միայն կարող են զարգացնել տնտեսական հարաբերությունները, այլև կարող են համագործակցել ավանդական արժեքների պահպանման հարցում։
Նման եզրակացության հանգեցին «Հայաստան-Ղրղըզստան. Տնտեսական համագործակցություն և հեռանկարներ» տեսակապին մասնակցած փորձագետները։ Հումանիտար զարգացման Միջազգային հասարակական կազմակերպության փոխնախագահ Ծովինար Կոստանյանը կարծում է, որ Հայաստանի համար կարևոր են ավանդական արժեքները։ Խոսքը, մասնավորապես, ընտանեկան արժեքների, մշակութային և հումանիտար բնույթի հարցերի մասին է։
«Հայաստանում հասարակական կազմակերպություններ կան, որոնք ներկայանում են որպես երիտասարդական կառույցներ և ֆինանսավորվում են արտասահմանյան աղբյուրներից։ Բայց նրանք աշխատում են ավանդական արժեքների խարխլման ուղղությամբ և քարոզում են այն, ինչն օտար է հայ իրականությանը», — նշեց Կոստանյանը։
Փորձագետը կարծում է, որ այս առումով հայ և ղրղըզ երիտասարդության ներկայացուցիչները պետք է շահագրգռված լինեն ազգային կերպարի, ավանդույթների, արժեքների պահպանման հարցում, ինչը միավորում է եվրասիական տնտեսական տարածքի երկրներին։ Բացի այդ, ինչպես նշեց Կոստանյանը, Հայաստանի կյանքում հատուկ տեղ է գրավում կրոնը։
«Ղրղըզստանի բնակչության մեծամասնությունը իսլամ է դավանում, և հետաքրքիր կլիներ երկխոսության համար հարթակ ստեղծել, որի շնորհիվ մենք կկարողանայինք մեր ավանդույթների ընդհանրություններ գտնել, այն, ինչը մերձեցնում է մեզ», — ավելացրեց փորձագետը։
Հումանիտար զարգացման միջազգային հասարակական կազմակերպության նախագահ Արման Ղուկասյանն իր հերթին նշեց, որ արևմուտքը Հայաստանում նաև մի շարք շարժումներ է ֆինանսավորում։
«Հայ երիտասարդության որոշակի մասը կողմ է ԵՏՄ-ին, Հայաստանի և Ռուսաստանի միությանը, սակայն այստեղ շատ անելիքներ կան։ Եվ այսօր կարևորագույն խնդիրներից մեկը, որը ծառացել է իմ և գործընկերներիս առջև, այն է, որ համակարգենք այդ ուղղությամբ տարվող աշխատանքները», — ասաց Ղուկասյանը։
Նա ավելացրեց, որ եվրասիամետ հայացքները թույլ կտան պահպանել ժամանակակից Հայաստանի արժեհամակարգը։
