ԵՐԵՎԱՆ, 27 մարտի — Sputnik. ԵԱՀԿ Մինսկի խմբի համանախագահ Ռիչարդ Հոգլանդը Երևանում լրագրողներին ասաց, որ բոլորին է հայտնի, որ բանակցային սեղանին Ղարաբաղյան հիմնախնդրի կարգավորման ծրագրեր են դրված:
«Դրանք վերջնական տարբերակը չեն, բայց բավականին խելամիտ առաջարկեր են։ Դա նշանակում է, որ ժամանակն է բանակցելու»,- ասաց նա՝ հավելելով, որ պետք է աշխատանք տարվի, որ հիմնախնդիրը խաղաղ կարգավորում ունենա:
Նա նշեց, որ այս ամենը դժվար ու բարդ գործընթաց է, բայց կողմերը պետք է հասկանան, որ ժամանակն է վերադառնալ բանակցային սեղանի շուրջ:
Անդրադառնալով ԵԱՀԿ Մինսկի խմբի համանախագահների հայտարարություններին, որոնցում հասցեատերեր չկան՝ նա նշեց, որ հավատացնում է, որ իրենք իսկապես գիտեն, թե ինչ է կատարվում, ինչ է տեղի ունենում։
«Բայց, քանի որ մենք միջազգային միջնորդներ ենք, մենք պետք է մի փոքր հեռավորություն պահպանենք, մենք չպետք է խոսենք որևէ կողմից, որովհետև եթե այդպես լինի, ապա քննարկումների, միջնորդության հնարավորությունը կփակվի: Մենք իրավունք չունենք դռները փակելու, մենք պարտավոր ենք այդ դռները բաց թողնել»,-ասաց նա:
Ռիչարդ Հոգլանդը նշեց, որ խնդիրները պետք է ուշադրության արժանանան, բայց իրենք փոքր-ինչ զգույշ պետք է լինեն հասարակության առջև խոսելիս, նույնիսկ եթե գիտեն, թե փակ դռների հետևում ինչ է կատարվում։
