Պուշկին և Փարպեցի փողոցների խաչմերուկում կանգնած այս շենքը 130 տարուց ավել պատմություն ունի: Երկհարկանի, սև տուֆից, իր չափերի մեջ համեստ և միևնույն ժամանակ ներդաշնակ կառույցը երևանցիներին հայտնի է նրանով, որ այստեղ երկար տարիներ գործել է Հայաստանի դեղատնային գլխավոր վարչությունը: Շենքը կառուցվել է 19-րդ դարի 80-ական թվականներին (ճարտարապետ` Գուրեցկի), երբ Ռուսական կայսրության բոլոր նահանգներում պայքար էր մղվում երկրում բռնկված տարբեր համաճարակների դեմ: Այդ նպատակով որոշում ընդունվեց բոլոր նահանգային վարչական կենտրոններում հիմնել մասնագիտացված հակահամաճարակային բուժկայաններ՝ դեղերի պահեստարաններով: Երևանում, Սուրբ Զորավոր եկեղեցուց մի փոքր ներքև, կառուցվեց ահա այս անկյունային գեղեցիկ շենքը:
![улица Пушкина 56 улица Пушкина 56 - Sputnik Արմենիա](https://cdn.am.sputniknews.ru/img/679/87/6798729_0:0:1600:1023_600x0_80_0_0_9853fe5448b286fc875f87b93a632a99.jpg)
Շենքի ճարտարապետական յուրահատկություններն են դասական ոճի դեկորատիվ խոյակները և մի քանի շերտերից բաղկացած ու շենքի ողջ երկայնքով ձգվող բազմաշերտ քիվերը: Շքամուտքը՝ Պուշկինի (նախկինում՝ Թարխանովսկայա) փողոցից է, իսկ Փարպեցու փողոցի կողմից երկրորդ դուռը բացվել է ավելի ուշ՝ խորհրդային տարիներին:
Հայտնի է, որ 20-րդ դարասկզբին այստեղ է տեղակայված եղել Երևանի քաղաքային գործադիր մարմնի (ուպռավայի) բժշկական հարցերով զբաղվող հանձնաժողովը, որին կից գործել է փոքր դեղատուն, և դա եղել է Երևանի առաջին դեղատներից մեկը: Հայաստանի առաջին Հանրապետության օրոք իր աշխատանքներն այս շենքում էր կազմակերպում Հայաստանի կառավարության Հանրային խնամատարության նախարարությանը կից գործող բժշկասանիտարական բաժինը: Խորհրդային կարգերի հաստատումից հետո, 1920 թվականի դեպտեմբերի 22-ի Հայկական ԽՍՀ հեղկոմի հատուկ հրամանագրով (դեկրետով) կազմակերպվում է Խորհրդային Հայաստանի առողջապահության նախարարությունը (ժողկոմիսարիատը), որը սկսում է գործել նույն այս շենքում՝ ընդհուպ մինչև 1936 թվականը: Ի դեպ, 1920-1922 թթ. առողջապահության առաջին նախարարն է եղել Սարգիս Համբարձումյանը:
1936-ից հետո շենքը տրամադրվում է առողջապահության նախարարության Հայբուժպետառին և նրա պահեստին: 1942-ի սկզբից այս շենքում և կից տարածքում գործել է Երևանի Քիմդեղագործարանը, որի արտադրամասերում պատրաստված ողջ արտադրանքը՝ դեղերը, բժշկական նյութերն ու պարագաները ուղարկվել են խորհրդա-գերմանական ռազմաճակատ: Հետագայում, այստեղ երկար տարիներ տեղակայված է եղել Հայաստանի Դեղատնային գլխավոր վարչությունը և գործել է դեղատուն, որը մինչ այժմ էլ գործում է:
![Պուշկինի 56. Հին Երևանի կանգուն վկաները Պուշկինի 56. Հին Երևանի կանգուն վկաները - Sputnik Արմենիա](https://cdn.am.sputniknews.ru/img/679/91/6799107_0:0:1599:1005_600x0_80_0_0_750385cb012a7abf093a96a186ca4263.jpg)
![Պուշկինի 56. Հին Երևանի կանգուն վկաները Պուշկինի 56. Հին Երևանի կանգուն վկաները - Sputnik Արմենիա](https://cdn.am.sputniknews.ru/img/679/90/6799048_0:0:1600:1004_600x0_80_0_0_497e6b53d312441e7074576d35d0d075.jpg)
![Պուշկինի 56. Հին Երևանի կանգուն վկաները Պուշկինի 56. Հին Երևանի կանգուն վկաները - Sputnik Արմենիա](https://cdn.am.sputniknews.ru/img/679/89/6798990_0:0:1594:1002_600x0_80_0_0_332d3142b5b3a413e5a136dd705adfc1.jpg)
![Պուշկինի 56. Հին Երևանի կանգուն վկաները Պուշկինի 56. Հին Երևանի կանգուն վկաները - Sputnik Արմենիա](https://cdn.am.sputniknews.ru/img/679/88/6798875_0:0:1600:1004_600x0_80_0_0_e8d6c24d7661b5df2327c4283020cc15.jpg)
![Պուշկինի 56. Հին Երևանի կանգուն վկաները Պուշկինի 56. Հին Երևանի կանգուն վկաները - Sputnik Արմենիա](https://cdn.am.sputniknews.ru/img/679/88/6798818_0:0:1600:1005_600x0_80_0_0_3748843ab12934df1c821b7ed557ad71.jpg)
Անցյալ տարի մասնավոր մի ընկերության կողմից իրականացվեց շենքի արտաքին հարդարանքի հիմնովին վերանորոգում՝ պահպանելով շինության նախնական տեսքը: Ներկայումս վերանորոգման աշխատանքները շարունակվում են նաև շենքի ներսում, որից հետո այստեղ նախատեսված է տեղակայել մասնավոր բժշկական կլինիկա: