ԵՐԵՎԱՆ, 26 մարտի-Sputnik. Գոհար Սարգսյան. Փարիզի «Զենիթ» համալիրում այս պահին փորձեր են, այլ կերպ ասած՝ ստեղծագործական իրարանցում աշխարհի տարբեր երկրներից ժամանած հայ արտիստների ու պարային խմբերի մասնակցությամբ: 7 հազար տեղանոց համալիրից Sputnik Արմենիային ողջունեց հայազգի հայտնի օպերային երգիչ Ադամ Բարրոն:
«Սա պատմական պահ է: Առաջին անգամ է, որ Եվրոպայում, նման հսկայական դահլիճում, անցկացվում է մասշտաբային միջոցառում, որտեղ մասնակից են աշխարհի տարբեր երկրներից ժամանած հայտնի հայերը, և իշխում է հայկական շունչը»,-ասաց Բարրոն:
Իրական հայը չի կարող մոռանալ այն կռունկի մասին, որը պետք է վերադառնա Հայաստան, Sputnik Արմենիայի հետ զրույցում ասաց Ադամ Բարրոն: Պատահական չէ, որ «Armenian Europe Music Awards Paris 2017» երաժշտական մրցանակաբաշխությանը նա ներկայացնելու է նաև Կոմիտասի «Կռունկը»:
«Յուրօրինակ մեկնաբանությամբ ներկայացնելու եմ մի ստեղծագործություն, երբ պանդուխտ հայը լուր է ակնկալում կռունկից: Անբացատրելի գեղեցիկ երևույթ է: Այս միջոցառմամբ ցույց եք տալիս նաև հայերի միասնականությունը: Ինչքան էլ հայրենիքից հեռու ենք, բայց մեր ուշքն ու միտքն այդտեղ է՝ Հայաստանում, մեր հայրենիքում»,-նշեց նա:
Հայտնի օպերային երգիչը 17 տարի է, ինչ ապրում է Փարիզում: Այնտեղ է մեկնել ուսումը շարունակելու և առավել մասնագիտանալու համար: Այս պահին, որքան էլ օտար հողում կայացած է ու հայտնի, բայց չի բացառում, որ Հայաստան է վերադառնալու: Այսօր՝ Փարիզի ժամանակով 19:30-ին տեղի կունենա «Armenian Europe Music Awards Paris 2017» երաժշտական մրցանակաբաշխությունը: Ադամ Բարրոն կներկայացնի Կոմիտասի «Կռունկը» և Կաչչինիի «Ավե Մարիան»:
Պատասխանատու մրցանակաբաշխությունից առաջ Ադամ Բարրոն խոստացավ նաև պատմել արդյունքների մասին, երբ արդեն ավարտված կլինի սպասված իրադարձությունը:
Տեեկացնենք, որ վերջին անգամ, Ադամ Բարրոն Հայաստան է ժամանել 2013 թվականի ապրիլին: Երևանում առաջին անգամ նա հայ երաժշտասերներին էր ներկայացրել կոմպոզիտոր Ադոլֆ Հասսեի բարոկկո ժանրի «Լարինդա և Վանեսիո» կատակերգական օպերան, որը մեծ ընդունելության արժանացավ:
