Լաուրա Սարգսյան, Sputnik.
Մի շարք միջազգային կազմակերպություններ և փորձագետներ կարծում են, որ ԸՕ-ում արված փոփոխությունները կապահովեն ազնիվ և արդար ընտրությունների անցկացումը: Այս ամենի վրա ստվեր գցեց ընտրողների անունները՝ գրանցման հասցեով և ստորագրությամբ համացանցում հասանելի լինելու նորությունը:
ԵԱՀԿ Ժողովրդավարական ինստիտուտների և մարդու իրավունքների Բյուրոյի միջանկյալ զեկույցում նշվում էր, որ այդ հարցը մտահոգություն է առաջացրել. ցուցակների հրապարակումը կարող է գաղտնազերծել ընտրողների անձնական տվյալները:
«Միանշանակ պատասխան չկա՝ խախտվում են այդպիսով մարդու իրավունքները, թե՞ ոչ: Թեև ոմանք դեմ են իրենց տվյալների հրապարակմանը, սակայն, պետք է հիշել, որ ստորագրությունը թույլ կտա հաստատել ընտրողի ներկայությունը, ինչը կբարձրացնի ընտրությունների թափանցիկության մակարդակը», — Sputnik Արմենիայի թղթակցի հետ զրույցում ասաց «Քաղաքացի դիտորդ» նախաձեռնության ներկայացուցիչ Արմեն Գրիգորյանն` ընդգծելով, որ դրանում մարդու իրավունքների առանձնակի ոտնահարում չի տեսնում, քանի որ ամբողջ կյանքի ընթացքում մարդիկ իրենց ստորագրությունները թողնում են ամենատարբեր փաստաթղթերի տակ: Իսկ այդ մեխանիզմը թույլ կտա նվազեցնել ընտրակեղծիքները, կարծում է Գրիգորյանը:
Հայաստանի ԸՕ-ում կատարված փոփոխությունները որոշակի սահմանափակումներ մտցրեցին ԶԼՄ-ների գործունեության մեջ: ՀՀ ԸՕ 31-րդ հոդվածի 8-րդ մասի համաձայն, մեկ ԶԼՄ-ից հավատարմագրված լրագրողների թիվը չի կարող գերազանցել 50-ը:
Իսկ յուրաքանչյուր կազմակերպություն կարող է հավատարմագրել միայն մեկ լրատվական գործակալություն: Ստացվում է, որ նույնիսկ ցանկության դեպքում մեդիա ռեսուրսը չի կարող երկրի բոլոր ընտրատարածքներում ներկայություն ապահովել:
Հայաստանում ընդհանուր առմամբ գրանցված է 3200 դիտորդ՝ 1600 ընտրատարածքում: Գրանցվածների 10%-ը կամ 320 մարդ` Վրաստանում, Ռուսաստանում, Ֆրանսիայում, ԱՄՆ-ում բնակվող սփյուռքահայեր են: Դրանց թվում են նաև Արսինե Խանջյանը, Ատոմ էգոյանն ու Սերժ Թանկյանը:
Խորհրդարանական ընտրությունները կանցկացվեն ապրիլի 2-ին: 2015 թվականին ընդունված Սահմանադրական փոփոխություններից հետո սա առաջին համապետական ընտրություն է, որով նախատեսվում է անցում կատարել կառավարման խորհրդարանական համակարգին, երկրի ներկայիս ղեկավարի իրավասությունների ժամկետի ավարտից՝ 2018 թվականից հետո:
Ընտրություններին մասնակցում է 9 քաղաքական ուժ, որոնց թվում 5 կուսակցություն և 4 դաշինք` ՀՀԿ, Կոմկուս, ՀՅԴ, «Ազատ դեմոկրատներ», «Հայկական վերածնունդ», ինչպես նաև «Ելք», «Կոնգրես-ՀԺԿ», «Օհանյան-Րաֆֆի-Օսկանյան» և «Ծառուկյան» դաշինքները:
