ԵՐԵՎԱՆ, 24 մարտի — Sputnik ՀՖՖ Տեխնիկական կենտրոնում`Ֆուտբոլի ակադեմիայում, տեղի ունեցավ Հայաստանի 2016 թ. լավագույն ֆուտբոլիստների և լավագույն մարզչի պարգևատրման արարողությունը:
Հայաստանի ֆուտբոլի ֆեդերացիայի նախագահ Ռուբեն Հայրապետյանը լավագույն ֆուտբոլիստի մրցանակը հանձնեց Հենրիխ Մխիթարյանին:
«Մրցանակն ինձ ուժ կտա, և ես առավելագույնս կանեմ, որպեսզի նորից կարողանամ արժանանալ այս մրցանակին»,- ասաց Հենրիխ Մխիթարյանը։
Երկրորդ տեղի համար մրցանակ ստացավ Գևորգ Ղազարյանը, երրորդ տեղի համար` Մարկոս Պիզելլին։
Հենրիխ Մխիթարյանը մրցանակաբաշխությունից հետո խոսեց նաև Հայաստան-Ղազախստան հանդիպման մասին, որը կկայանա այս կիրակի`մարտի 26-ին։
«Բոլորն էլ շատ լավ են տրամադրված առաջիկա խաղին, կխաղանք հաղթանակի համար»,- ասաց նա։
Նշենք, որ լավագույն մարզչի մրցանակը ստացավ «Շիրակի» գլխավոր մարզիչ Վարդան Բիչախչյանը։
