ԵՐԵՎԱՆ, 24 մարտի — Sputnik. ԶԼՄ-ները հայտնում են, որ Կենտրոն և Նորք-Մարաշ վարչական շրջանների ընդհանուր իրավասության դատարանը բավարարել է Ազգային անվտանգության ծառայության՝ Սամվել Բաբայանին երկու ամսով կալանավորելու վերաբերյալ միջնորդությունը:
Բաբայանի փաստաբան Ավետիս Քալաշյանը հայտնել է, որ նրան մեղադրանք է առաջադրվել Քրեական օրենսգրքի 235 հոդվածի 2-րդ մասի և 235.1 հոդվածի 2-րդ մասի առաջին կետի հատկանիշներով՝ ապօրինի կերպով ռազմամթերքի, ռազմական տեխնիկայի ձեռք բերելը, իրացնելը, պահելը, փոխադրելը կամ կրելը, մաքսանենգությունը, որոնք կատարվել են մի խումբ անձանց կողմից նախնական համաձայնությամբ:
Սամվել Բաբայանն ավելի վաղ հայտնել էր, որ իրեն անհիմն մեղադրանք է առաջադրվել:
Նշենք, որ ԱԱԾ-ն հայտարարություն էր տարածել, որ մաքսանենգ եղանակով ՀՀ «Իգլա» տեսակի զենիթահրթիռային համալիր տեղափոխելու փաստի առթիվ հարուցված քրեական գործի շրջանակում ձերբակալվել է 3 անձ, այդ թվում՝ Արցախի պաշտպանության նախկին նախարար Սամվել Բաբայանը։
