Հանրապետության նախագահը ողջունել է հյուրերին և գոհունակությամբ ընդգծել, որ հայ-ռուսական հարաբերություններն ու փոխգործակցության օրակարգն անընդհատ զարգանում և հարստանում են՝ ներառելով նորանոր բնագավառներ. միջպետական, միջխորհրդարանական ձևաչափերով ակտիվ փոխգործակցության հետ մեկտեղ ընդլայնվում են կապերն ակադեմիական, հասարակական շրջանակների միջև:
Սվետլանա Չուպշևան և Արտյոմ Ավետիսյանը Սերժ Սարգսյանին ներկայացրել են իրենց գլխավորած կազմակերպությունների գործունեությունը, վերջին շրջանի հետաքրքիր նախաձեռնությունները և պատրաստակամություն հայտնել սերտացնելու կապերը հայաստանյան գործընկերների հետ՝ փոխադարձաբար հյուրընկալելով նրանց Ռուսաստանում:
Հյուրերը ՀՀ նախագահին նաև իրենց տպավորություններն են ներկայացրել Հայաստանում ունեցած հանդիպումների, այցելությունների վերաբերյալ:
Նրանք նշել են, որ Հայաստանը և Ռուսաստանն իրենց տնտեսությունների զարգացման ռազմավարական վեկտորների ընտրության հարցում որոշակի ընդհանրություններ ունեն՝ կադրերի պատրաստման, երիտասարդության կրթությունը խրախուսելու, զարգացնելու, որպես ապագայի մասնագիտություն՝ գիտատեխնիկական գործունեության մեջ երեխաներին ինչ-որ ձևերով ներգրավելու հետաքրքիր ծրագրերով և այլն: Այս ամենը, նրանց համոզմամբ, Հայաստանի հետ համագործակցությունն ավելի գրավիչ ու հեռանկարային է դարձնում:
