ԵՐԵՎԱՆ, 23 մարտի — Sputnik. Աբու Դաբի քաղաքում կայացած Հայաստան-Արաբական Միացյալ Էմիրություններ ներդրումային համաժողովի շրջանակում Հիդրո Կորպորացիա ընկերությունների խմբի և Estekshaf Investment Company միջև կնքվել է վերականգնվող էներգետիկայի, մասնավորապես հիդրոէներգետիկայի ոլորտում ներդրումների իրականացման Փոխըմբռնման հուշագիր: Այս մասին Sputnik Արմենիային հայտնում են Հայաստանի Հանրապետության վերականգնվող էներգիա արտադրողների ասոցիացիայից։
Հիդրոկորպորացիայի հիմնադիր Գրիգոր Առաքելյանի դիտարկմամբ` հուշագիրը հիմք է հանդիսանալու առաջիկայում կողմերի միջև կնքվող համագործակցության պայմանագրի համար:
«Բանակցում ենք վերականգնվող էներգետիկայի ոլորտում լայնամաշտաբ և երկարաժամկետ ծրագրերի իրականացման շուրջ՝ մի քանի փուլերով»,-նշել է Առաքելյանը՝ հավելելով, որ ծրագրերի նպատակն է արդիականացնել արտադրողականության ցածր մակարդակ և վարկային ծանր պորտֆել ունեցող, բնապահպանական նորմերի խախտումներով կառուցված փոքր ՀԷԿ-երը:
