ԵՐԵՎԱՆ, 23 մարտի — Sputnik. The Washington Post ամերիկյան պարբերականը հրապարակել է Նիկ Կիրկպատրիկի հոդվածը և ներկայացրել Լենա Մուխայի նկարած լուսանկարները։ Հոդվածը պատմում է հայուհի կուրսանտների մասին։
Հոդվածում խոսվում է այն մասին, որ Ղարաբաղյան հակամարտության գոտում ապրիլյան պատերազմը մի շարք աղջիկների դրդել է մարտահրավեր նետել ավանդական գենդերային կարծրատիպերին և զենք վերցնել ձեռքը։
«Նրանք կարծրատիպեր կոտրողներ են, առերեսվում են շատ պահպանողականների դիմադրությանը, քանի որ որոշել են կարիերա ստեղծել այնպիսի ոլորտում, որտեղ կանայք դեռևս ընդունված չեն»,- պատմել է լուսանկարիչը:
Հայաստանի մայրաքաղաք Երևանում աղջիկներն առաջին անգամ ռազմական ակադեմիա են ընդունվել 2017 թվականին։ Մեկ տարի անց Լեռնային Ղարաբաղի ռազմական բուհն ընդունելություն կազմակերպեց աղջիկների համար, նշված է հոդվածում։
Լուսանկարիչը երկու հաստատություններում էլ եղել է անցյալ տարի։ Նրա խոսքով` անկախ այն փաստից, որ աղջիկներից շատերը մեծացել են զինծառայողների ընտանիքում, միևնույն է՝ ստիպված են լինում որոշակի դժվարություններ հաղթահարել իրենց ընտրած ճանապարհին։
«Կանայք չպետք է բանակում լինեն, դա նրանց տեղը չէ։ Նրանք պարզապես նման չեն տղամարդկանց», — Մուխային է ասել Երևանի ռազմական ակադեմիայի հրահանգիչներից մեկը։
