ԵՐԵՎԱՆ, 22 մարտի — Sputnik. Ստորջրյա պեղումների ժամանակ Ղրիմի կամրջի կառուցման մերձակայքում հնագետները տղամարդու գլխի ձև ունեցող քանդակի խոշոր կտոր են հայտնաբերել։ Այս մասին հայտնում է «Ղրիմի կամուրջ» տեղեկատվական կենտրոնը։
Հավանաբար դա հին հունական աստվածներից մեկի պատկերն է, որն արվել է կիսանդրու կամ արձանի տեսքով։ Բոլոր գտածոները մշակվում և ուսումնասիրվում են, որից հետո փոխանցվում են Ղրիմի «Արևելյան պատմամշակութային արգելոց» թանգարանի ֆոնդին։
«Մեր տվյալների համաձայն` Հյուսիսային Մերձսևծովյան շրջանի համար այս գտածոն բացառիկ է, որի ֆունկցիոնալ նշանակությունը, ծագումն ու թվագրումը պարզելու համար մենք կաշխատենք հին հունական արվեստի առաջատար մասնագետների հետ, ինչպես նաև կավի բաղադրության լաբորատոր ուսումնասիրություններ կանցկացնենք։ Ներկա պահին մենք կարծում ենք, որ գլուխը պատրաստված է Փոքր Ասիայում մ.թ.ա. V դարում», — ասել է ԳԱԱ հնագիտության ինստիտուտի ստորջրյա ջոկատի պետ Սերգեյ Օլխովսկին։
Հնագետների գտած կտորը խոշոր արձանի մասնիկ է։ Գլուխը, որը բնական չափեր ունի, պատրաստված է կավից։ Հում կավից պատրաստել են մազերն ու մորուքը, այնուհետև արձանը թրծվել է։
Այս տեխնոլոգիան կիրառվում էր մ.թ.ա. VI դարում, սակայն հիմնականում 40 սմ-ից ոչ ավելի բարձրություն ունեցող արձանների համար, գրված է հաղորդագրության մեջ։
«Քանդակի ոճը թույլ է տալիս ենթադրել, որ գլուխը պատրաստել են մ.թ.ա. V դարում Փոքր Ասիայի հունական քաղաքներից մեկում, հույն-պարսկական պատերազմների և դասական հունական մշակույթի ծաղկման դարաշրջանում», — գրված է հաղորդագրության մեջ։
Կերչի նեղուցով անցնող կամուրջը, որը Ղրիմը կկապի Կրասնոդարի երկրամասի հետ, ամենաերկարն է լինելու Ռուսաստանում (երկարությունը` 19 կմ)։
