ԵՐԵՎԱՆ, 22 մարտի — Sputnik. Հայ-ռուսական նոր ներդրումային նախագծերը կիրականացվեն մինչև 2017 թվականի ավարտը, Sputnik Արմենիա մամուլի կենտրոնում կայացած մուլտիմեդիոն ասուլիսի ընթացքում ասաց ՌԴ-ում Հայաստանի արտակարգ և լիազոր դեսպան Վարդան Տողանյանը։
«Ներդրումների ներգրավումը մեր աշխատանքի կարևորագույն ասպեկտներից է։ Հայաստանի նախագահի այցի ժամանակ ՀՀ էկոնոմիկայի նախարարության և Ուղիղ ներդրումների հիմնադրամի միջև փաստաթղթեր են ստորագրվել` ներդրումային հիմնադրամ ստեղծելու վերաբերյալ», — ասաց Տողանյանը։
Նրա խոսքով` այդ հիմնադրամի ներգրաված միջոցներով Հայաստանում նոր և հետաքրքիր նախագծեր կիրականացվեն։ Սա համակարգային աշխատանք է, որի ուղղությամբ կաշխատի դեսպանատունը։ Նա նշեց, որ այդ նպատակով Հայաստան կժամանի ՌԴ նախագահին կից գործող ռազմավարության ուսումնասիրման գործակալության խումբը։
«Խմբում ընդգրկված են միջին բիզնեսի առաջնորդները, որոնց գլխավորում է Արտյոմ Ավետիսյանը։ Նրանք կշրջագայեն տարբեր ձեռնարկություններով, կծանոթանան ներդրումային նախագծերին։ Նրանցից հետո Հայաստան կժամանի մեր հայրենակիցների խումբը` պատրաստի նախագծերով», — ասաց Տողանյանը։
Այս կապակցությամբ նա հայտնեց, որ էկոնոմիկայի և գյուղատնտեսության նախարարությունները կոնկրետ բիզնես ծրագրեր ունեն, որոնք ներկայացնելու են հայ դիվանագետները։
«Հուսով եմ, որ այս տարվա ընթացքում կոնկրետ քայլեր և ներդրումներ կարվեն», — ասաց Տողանյանը։
Ավելի վաղ տնտեսական զարգացման և ներդրումների նախարար Սուրեն Կարայանը հայտնել էր, որ Հայաստանը կարող է ավելի քան 300 մլն դոլար ներդրում ներգրավել Ռուսաստանից։
