ԵՐԵՎԱՆ, 21 մարտի — Sputnik. Պուշկինի անվան ինստիտուտի ռուսաց լեզվի ուսումնասիրման և թեստավորման կենտրոնը, որը երեքշաբթի բացվեց Երևանի Խ. Աբովյանի անվան պետական մանկավարժական համալսարանում, թույլ կտա միջազգային կարգի մասնագետներ պատրաստել։
Այս մասին հայտնեց Ա.Ս. Պուշկինի անվան ռուսաց լեզվի պետական ինստիտուտի ռեկտոր Մարգարիտա Ռուսեցկայան։
«Այստեղ շատ հարմարավետ է ու լուսավոր։ Տարածքը լցված է Ալեքսանդր Սերգեևիչի պայծառ կերպարով։ Ամեն ինչ անսովոր էր այստեղ», — ասաց Ռուսեցկայան ու ավելացրեց, որ կոլեկտիվի և կենտրոնի առջև մեծ պատասխանատվություն է զգում նոր կենտրոնի ապագայի վերաբերյալ։
«Իմ և Պուշկինի ինստիտուտի ամբողջ կոլեկտիվի անունից հավաստիացնում եմ, որ ամեն բան կանենք, որ ոչ միայն պատերի, այլև ինստիտուտի ներսում վառ պահենք Ալեքսանդր Սերգեևիչ Պուշկինի և Պուշկինի ինստիտուտի ներկայությունը։ Համոզված եմ, որ կադրեր պատրաստելու, երիտասարդ մասնագետներ փոխանակելու մեր համատեղ ծրագրերը, ինչպես նաև դպրոցները, որտեղ ուսումնասիրվում է ռուսաց լեզուն կլինեն ժամանակակից, նորարար, հիմնված ավանդական արժեքների և մեր բուհերի լավագույն գիտական հենքի վրա», — նշել է նա։
Ռուսեցկայան շնորհակալություն հայտնեց մանկավարժական համալսարանի կոլեկտիվին` հրաշալի պատրաստվածության համար և վստահեցրեց, որ արժանապատիվ կշարունակեն սկսած գործը։
Որպես ռուսական մշակույթի խորհրդանիշ` նա բուհին Տուլայի ինքնաեռ և ռուսաց լեզվի 25 տարում ստեղծված Մեծ բացառիկ բառարան նվիրեց։
Հայաստանի մանկավարժական համալսարանի ռեկտոր Ռուբեն Միրզախանյանն իր հերթին նշեց, որ սկիզբը խոստումնալից է, իսկ իրենք ամեն բան կանեն`ծրագրերը կյանքի կոչելու համար։
«Շնորհակալ եմ մեր քանդակագործին այս հրաշալի հեղինակային աշխատանքի համար։ Իհարկե, ես այսօր նրան զգուշացրել եմ, որ իր Ալեքսանդր Սերգեևիչը «փոքր-ինչ հայկական արմատներ ունի», իսկ դուք (Ռուսեցկայա — խմբ.) դա հաստատեցիք։ Բնականաբար, յուրաքանչյուր ժողովուրդ իր մոտեցումն է ներդնում` ցույց տալով իր անկեղծ սերն ու մեծ հարգանքը», — ասաց Միրզախանյանը։
Նա նշեց, որ կենտրոնում ռուսաց լեզու է դասավանդվելու, ինչպես նաև անցկացվելու են վերապատրաստման դասընթացներ`ամենատարբեր մակարդակներով։
