Արմենուհի Մխոյան. Sputnik.
Թատրոնը միայն բեմն ու դերասանը չեն: Դերասանի հետևում մի ամբողջ համակարգ է՝ ձայնային ու լուսային էֆեկտներ, տվյալ դարաշրջանին համահունչ դեկորացիաներ, զգեստներ ու դիմահարդարում, որոնք ճիշտ օգտագործելու դեպքում ներկայացման հաջողությունն ապահովված է:
Ռուդիկ Ոսկենյանը մոտ 40 տարի է՝ Հայաստանի հնագույն թատրոններից մեկի՝ Գյումրու Վարդան Աճեմյանի անվան պետական դրամատիկական թատրոնի դերձակն է: Անկեղծանում է՝ դերձակներ շատ կան, բայց քչերն են կարող դերասանի համար հագուստ կարել:
«Վաստակած հանգստի էի անցել, բայց թատրոնի տնօրինությունը ստիպված կրկին ինձ աշխատանքի հրավիրեց. մասնագետներ չկան: Ամեն մի դերձակ չէ, որ կարող է ռեժիսորի ճիշտ պահանջը կատարել ու ստանալ հենց էսքիզով ներկայացված հագուստը,- ասում է դերձակը, հետո ավելացնում,- կյանքի համար կարված հագուստը միայն տիրոջն է ուրախացնում, թատրոնինը՝ հազարավոր մարդկանց, այն էլ՝ տարիներով»:
Արդեն ավելի քան 150 տարվա պատմություն ունեցող թատրոնը, Մայր թատրոնից հետո, թատերական զգեստների ամենահարուստ ֆոնդն ունի, որտեղ պահվող հագուստները հարյուրավոր ներկայացումների հերոսների պատմություն են կրում իրենց մեջ:
Հայտնի դերասաններից շատերի հագուստներն այստեղ առանձնահատուկ խնամքով են պահվում: Դրանից մեկն էլ Գալյա Նովենցի զգեստն է, որը նա հագել է 1972 թվականին «Պատվի համար» ներկայացման ժամանակ, որտեղ մարմնավորում էր Մարգարիտի կերպարը:
«Հները նորոգվում, իսկ նոր ներկայացումների համար հագուստներ ինչպես կարվել, այնպես էլ կարվում են»,- նշեց թատրոնի բեմական մասի պատասխանատու Հարություն Մինասյանը:
Բեմական զգեստը մեծ դեր է խաղում դերասանի կերտած դերի վրա:
«Գուցե դերասանը շատ լավ է խաղում, բայց նրա խաղին ավելանում են հագուստն ու դիմահարդարումը և ավելի ցայտուն դարձնում դերասանի խաղը: Առանց զգեստների ու ատրիբուտների, որոնք մթնոլորտ են տալիս, հնարավոր չէ: Դերասանը կխաղա, բայց դրանք էլ են շատ կարևոր»,- ասում է թատրոնի գլխավոր ռեժիսոր Լյուդվիգ Հարությունյանը:
Չնայած թատրոնը չունի պատմության թանգարան, որտեղ հնարավոր կլիներ ցուցադրել ու հասարակությանը ներկայացնել այդ հարստությունը, սակայն աճեմյանցիները փորձում են պահպանել հին արժեքները: Կան զգեստներ, որոնք նույնիսկ 70-80 տարվա պատմություն ունեն:
