Շաբաթվա մարդիկ

Էմմա Խաշմանյան

2014թ-ին ավարտել է Սանկտ Պետերբուրգի պետական համալսարանի տուրիզմի բաժինը՝ ռեգիոնալ կառավարիչ մասնագիտությամբ: Վերջին 6 ամիսների ընթացքում աշխատում է «Մարիոթ» հյուրանոցում որպես կոմերցիոն ղեկավար:

-Երբ փոքր էի, երազում էի դառնալ բժիշկ և ճանապարհորդ:

Ապագայում ցանկանում է Հայաստանի գեղատեսիլ վայրերից մեկում, ինչպես ինքն է ասում՝ «Դիլիջանի կողմերը», հյուրատուն-գրախանութ ունենալ և արձակուրդներին «խուճուճ» երեխաների հետ վազվզել օվկիանոսի ափին:

Լիլի Շահումյան

Նորաձևության ոլորտի նկարիչ-դիզայներ, «ByLili» ապրանքանիշի հիմնադիր տնօրեն: Ավելի քան 14 տարի է՝ զբաղվում է նորարար մշակումներով, կոշիկի և պայուսակի արտադրությամբ:

-Մանկության տարիներին երազում էի նկարչուհի և երգչուհի դառնալ, բայց երբ հասկացա, որ յուրաքանչյուր մասնագիտության մեջ գլխավորը պրոֆեսիոնալիզմն է, իսկ դրա համար մեկ կյանքը բավական չէ, ընտրեցի դիզայնը՝ հուսալով, որ օրերից մի օր «կերգեմ» որպես նկարիչ:

Ապագայում ուզում է, որ իր ապրանքանիշը մեծ ճանաչում ունենա համաշխարհային շուկայում:

Դավիթ Յուխանյան

Արդեն 7 տարի է՝ աշխատում է ճարտարապետի մասնագիտությամբ, բայց դրան զուգահեռ հասցնում է ժամանակ հատկացնել նկարելուն: Սովորել է Երևանի ճարտարապետության և շինարարության պետական համալսարանում, ճարտարապետ մասնագիտությամբ, 2013- ից Երևանի Ճարտարապետների միության անդամ է:

- Փոքր ժամանակ ինչ ասես, որ չեմ ուզել դառնալ, բայց ամենամեծ ցանկությունս նկարիչ դառնալն էր:

Իր ապագան տեսնում է ճարտարապետության ու նկարչության մեջ:
Հ.Գ.
«Ինչպես ամեն ինչ, սկսած տիեզերքից մինչև ամենափոքր միջատ, բաղկացած են էլ ավելի փոքր մասնիկներից: Նույն սկզբունքով նկարում եմ ես. նկար՝ բաղկացած փոքրիկ նկարներից»,- ասում է Դավիթը:

Մա Նուշ Մելքումյան

Շուրջ 3 տարի է՝ զբաղվում է անհատ ձեռներեցությամբ: Մինչ այդ աշխատել է տարբեր ոլորտներում՝ հեռուստատեսությունից մինչև ՏՏ ոլորտ ու բիզնես խորհրդատվություն:

-Միշտ ցանկացել եմ հաղթող լինել ցանկացած ոլորտում, ինչպես Օլիմպիական չեմպիոնները կամ Նոբելյան մրցանակակիրները:

Մոտ ապագայում ցանկանում է ավարտել իր գրած գիրքը, սովորել իտալերեն, սերբերեն, մասնակցել ավտոմոբիլային միջազգային մրցաշավի: Ավելի հեռու ապագայի մասին խոսելիս ասում է. «կուզենայի ընտանիքիս տրամադրել ժամանակիս մեծ մասը, հանգստանալ տարբեր ծովերի ափերին, ամառանոցի պատշգամբից նայել, թե ինչպես են երեխաներս ֆոոտբոլ խաղում իրենց հայրիկի հետ»:

Հայկ Մուրադյան

4 տարի առաջ եղբոր հետ հիմնադրել են «Muradyan's Woodworks»-ը:
Զբաղվում է կահույքի դիզայնով ու պատրաստմամբ սեփական ֆիրմայում: Մասնագիտությամբ խեցեգործ-դիզայներ է:

-Մի օր Ֆրիդրիխ Նիցշե կարդացի ու մեջս «Գերմարդ» դառնալու ցանկություն արթնացավ:

Ապագայում ցանկանում է կարճամետրաժ ֆիլմեր նկարել հասարակ մարդկանց մասին ու իմաստով ապրել իրեն հատկացված ժամանակը:

Իրինա Մրյան

Մի քանի անգամ ընդունվել ու կիսատ է թողել բարձրագույն կրթությունը, բայց 2001-2005թթ-ին Ուկրաինայում աստվածաբանություն է ուսանել: Շուրջ 15 տարի է՝ զբաղվում է նախագծերի մենեջմենթով (porject manager), պատկերապատումների սցենարներ է գրում:

-Երբ փոքր էի, երազում էի մարմնամարզուհի լինել:

Ապագայում ուզում է մանկական գրքեր գրել:

Լյուսի Գրիգորյան

Անհիշելի ժամանակներից զբաղվում է ինքնակրթությամբ՝ զուգահեռ աշխատելով հիմնականում որպես թարգմանիչ: Մասնագիտությամբ գիդ է, թարգմանիչ, լեզվաբան, բանասեր, գրականագետ (ցուցակն ընդլայնվելու միտում ունի):

-Փոքր ժամանակ երազել եմ ունենալ մարդկությանը հայտնի գրեթե բոլոր մասնագիտությունները՝ հնէաբանից մինչև բալետի պարուհի, ծովահենից մինչև տիեզերագնաց ու դերասանուհի:

Ցանկանում է լավագույն գրախանութ-գրական ակումբ-գրադարանի հիմնադիրը լինել ու վերջապես ավարտին հասցնել գիրքը, որ գրում է։