ԵՐԵՎԱՆ, 18 մարտի — Sputnik. ՕՐՕ-ի հրապարակած հայտարարության մեջ նշված է, որ դաշինքի անդամները որոշել են նպաստել Հայաստանում ազգային համաձայնության մթնոլորտի ձևավորմանն ու բոլոր առողջ ուժերի համախմբմանը:
Ըստ հայտարարության՝ Հայաստանի ժողովրդի համբերության բաժակը լցվել է, իսկ ՀՀԿ-ի իշխանությանը մնացել է ընդամենը երկու շաբաթվա կյանք:
«Օհանյան-Րաֆֆի-Օսկանյան դաշինքը պատրաստականությունն է հայտնում Հայաստանի Հանրապետության Ազգային ժողով ընտրվելուց հետո այլ ընդդիմադիր քաղաքական ուժերի հետ միասնաբար ձևավորել Ազգային համաձայնության կոալիցիոն իշխանություն՝ բացառելով դրանում ՀՀԿ-ի ներգրավվումը, որի կապակցությամբ միասնաբար քննարկել և ստորագրել համապատասխան հուշագիր»,- նշված է հայտարարության մեջ:
Դաշինքի անդամները նպատակ ունեն «վերջ դնել երկրում համակարգային կոռուպցիային, իշխող կուսակցության՝ ՀՀԿ-ի քաղաքական մենաշնորհին, ամենաթողությանը, տնտեսության անարդյունավետ կառավարմանը և համատարած ապօրինություններին»:
