ԵՐԵՎԱՆ, 17 մարտի — Sputnik. Մոսկվայում կայացած MITT 24-րդ միջազգային ցուցահանդեսին հայկական տաղավարի բացակայությունը պայմանավորված է եղել ցուցահանդեսի կազմակերպիչների քաղաքականացված դիրքորոշմամբ: Նրանք պահանջել են, որ Հայաստանի տաղավարում Լեռնային Ղարաբաղի զբոսաշրջային արդյունքի որևէ հիշատակություն չլինի: Այս մասին տեղեկացնում է ՀՀ տնտեսական զարգացման և ներդրումների նախարարությունը։
Ոլորտի լիազոր մարմինը` ՀՀ տնտեսական զարգացման և ներդրումների նախարարության Զբոսաշրջության պետական կոմիտեն դիմել է ցուցահանդեսի կազմակերպիչներին` վերանայելու միակողմանիորեն ներկայացվող պայմանները, սակայն ի պատասխան ստացել է հայկական տաղավարը չեղյալ համարելու վերաբերյալ գրություն:
Հայկական կողմին ներկայացվող պահանջներին զուգահեռ ադրբեջանական կողմի տաղավարում և գովազդատեղեկատվական նյութերում մեծ տեղ է հատկացվել Լեռնային Ղարաբաղին, որի կապակցությամբ պարզաբանումներ կպահանջվեն կազմակերպիչներից:
Հարցը ներկայացվել է նաև ՀՀ արտաքին գործերի նախարարություն:
ԶԼՄ-ներում շրջանառվող այն տեղեկությունը, թե ցուցահանդեսի բացմանը ներկա է եղել հայկական պատվիրակությունը զբոսաշրջության պետական կոմիտեի նախագահ Զարմինե Զեյթունցյանի գլխավորությամբ չի համապատասխանում իրականությանը:
