ԵՐԵՎԱՆ, 17 մարտի — Sputnik. ԵՊՀ իրանագիտության ամբիոնի դասախոս, իրանագետ Ահարոն Վարդանյանը, հետևելով Իրանում տեղի ունեցող նախընտրական գործընթացներին, կարծիք է հայտնել, որ ընտրություններին ընդառաջ Իրանում աճում է քննադատությունը գործող նախագահի նկատմամբ։ Այս մասին նա գրել է իր ֆեյսբուքյան էջում։
«Նախագահական ընտրություններին ընդառաջ՝ հետաքրքիր զարգացումներ են տեղի ունենում Իրանում։
Ինչքան մոտենում է ընտրությունների օրը, այնքան թեժանում է ընտրապայքարը և դրան զուգահեռ՝ աճում քննադատության ալիքը գործող նախագահ Հասան Ռուհանիի դեմ՝ ընդ որում բարեփոխականների ճամբարից։
Ընդամենը մի քանի օր առաջ բարեփոխականները հայտարարել էին, որ ընտրություններում իրենց միասնական թեկնածուն ԻԻՀ գործող նախագահ Հասան Ռուհանին է, սակայն դրանից երկու օր անց տեղի ունեցած բարեփոխական թևի 15-րդ համագումարում, նրանք, ըստ երևույթի, ընդհանուր հայտարարի չեն եկել և համագումարից հետո հայտնի բարեփոխական գործիչ, Իրանում բավականին մեծ հեղինակություն վայելող Մոստաֆա Քավաքեբիանը հայտարարել է, որ Ռուհանին իրենց միակ տարբերակը չէ, և միասնական թեկնածուի հարցով դեռևս որևէ որոշում չի կայացվել։ Համագումարի ընթացքում որոշել են սպասել մինչ նովրուզյան տոների ավարտը։
Երեկ էլ Թվիթերի իր միկրոբլոգում Ռուհանիի և դատական իշխանության ղեկավար այաթոլլահ Սադեղ Լարիջանիի դեմ քննադատական գրառում էր կատարել հայտնի փաստաբան, իրավապաշտպան և բարեփոխական պատգամավոր Մահմուդ Սադեղին՝ կապված վերջերս իրանցի որոշ բարեփոխականների ձերբակալությունների հետ։ Նա բառացի գրել էր հետևյալը․
«Պարո՛ն հանրապետության նախագահ, պարո՛ն դատական համակարգի նախագահ, ինչու՞ չեք պատասխանում, ինչու՞ եք քաղաքացիների իրավունքների նկատմամբ անտարբեր»»,-գրել է իրանագետը։
