ԵՐԵՎԱՆ, 17 մարտի — Sputnik. Հայաստանի զարգացումը ուղիղ կապված է Արցախում խաղաղության հաստատման հետ, լրագրողներին այսօր ասաց ՀԱԿ խմբակցության նախագահ Լևոն Զուրաբյանը։
«Մեր ծրագիրը շատ իրատեսական է, այն անվտանգության և սոցիալական խնդիրների լուծման միակ ուղին է։ Մենք առաջարկում ենք Խաղաղության ծրագիր»,-ասաց Զուրաբյանը։
Նրա խոսքով` երկրի առաջ ծառացած հիմնական խնդիրը արցախյան կոնֆլիկտն է, որն էլ թույլ չի տալիս երկրին զարգացում ապրել։
Անդրադառնալով տեսակետներին, թե Խաղաղության ծրագիրն անիրատեսական է, քանի որ հնարավոր չի լինի պարտադրել այն Ադրբեջանին, Զուրաբյանը պատասխանեց, թե իրենք պացիֆիստ չեն, հասկանում են, որ խաղաղությունը պարտադրվում է:
«Մենք լավ գիտենք, որ երբ ձգտում ես խաղաղության, ուժի բաղադրիչը հզոր պետք է լինի: Բայց հասկանում ենք նաև, որ եթե Ադրբեջանին կանգնեցնում ես երկընտրանքի առաջ, թույլ ես տալիս հասկանալ, որ կա նաև խաղաղության ճանապարհը: Ադրբեջանը պետք է ընտրի՝ գնալ ռազմական ճանապարհո՞վ, թե՞ խաղաղ: Իրենք հասկանում են, որ ռազմական ճանապարհով գնալու դեպքում էլ Հայաստանն իրենց կջախջախի, իսկ խաղաղ լուծումը, բնականաբար, նշանակում է փոխզիջումներ, նշանակում է, որ երկու կողմն էլ պետք է ինչ-որ բան ստանան: Եթե երկու տարբերակները լինեն, Ադրբեջանը հարկադրված կլինի գնալ քաղաքական ճանապարհով»,- շեշտեց Լևոն Զուրաբյանը:
Լրագրողները խնդրանքով ՀԱԿ խմբակցության ղեկավարը մեկ անգամ ևս բացատրեց, թե ինչ է նշանակում խաղաղության ծրագիրը։ Արդյո՞ք այն նախատեսում է «հողերի հանձնում». «Ի՞նչ հողեր հանձնելու հարց: Մենք առաջարկում ենք ազատազրկված հողը պահպանելու, այն լեգիտիմ դարձնելու ծրագիր: Այսօր ինչ ուզում եք ասեք, Լեռնային Ղարաբաղի ազատագրումը ընդունված չէ միջազգային հանրության կողմից, ոչ ոք չի ճանաչել ԼՂ անկախությունը, չեն ճանաչում Ղարաբաղի ընտրությունները: Ստեղծված է մի փխրուն իրավիճակ, որն ամեն րոպե կարող է փոխվել:
Մենք ընդամենը ասում ենք, որ քաղաքական մաքսիմալիզմը շատ վտանգավոր բան է, որ եթե մենք չենք ամրապնդում մեր ռազմի դաշտի նվաճումները, վտանգում ենք Լեռնային Ղարաբաղի ապագան, որովհետև ցանկացած պահի Ադրբեջանը կարող է մտածել այդ հարցը ռազմական ուժով լուծելու մասին: Մենք ասում ենք՝ եկեք պահպանենք այդ հողը, ոչ թե հանձնենք: Հող հանձնելով զբաղված են նրանք, ովքեր պնդում են ստատուս-քվոյի պահպանման վրա, և 18 տարվա ընթացքը դա ապացուցում է»,-ասաց պատգամավորը:
Զուրաբյանը նշեց, որ իրենք ցանկանում են ձեռք բերել ամենակարևորը՝ միջազգային երաշխիքներով երաշխավորված խաղաղության պայմանագիր, որը թույլ կտա, որ աշխարհն ընդունի Արցախի անկախությունը:
