ԵՐԵՎԱՆ, 16 մարտի — Sputnik. Արթուր Սարգսյանի մահը որոշ ուժեր փորձում են շահարկել և նախընտրական փուլում դիվիդենտներ շահել։ ՀՀԿ ամենշաբաթյա նիստի ավարտին այսօր ասաց կուսակցության խոսնակ Էդուարդ Շարմազանովը։
Ինչ վերաբերում է մահվան պատճառներին, Շարմազանովը չցանկացավ գնահատականներ տալ՝ հավելելով, որ դա մասնագետների գործն է, բայց և հիշեցրեց, որ կալանավայրում գտնվելու ընթացքում, երբ նրա առողջությունը վատացել է, Արթուր Սարգսյանը մի քանի անգամ հրաժարվել է օգնությունից։
Շարմազանովը ցավակցություն հայտնեց «Հաց բերողի» հարազատներին։
Նշենք, որ Արթուր Սարգսյանը մահացել է այսօր՝ մարտի 16-ին, «Արմենիա» բժշկական կենտրոնում։
Նա հիվանդանոց էր տեղափոխվել մարտի 6-ին։ Մինչ այդ գտնվում էր Դատապարտյալների հիվանդանոցում։ Մի քանի օր առաջ նա ինքնակամ լքել էր հիվանդանոցը, սակայն երեկ սուր ցավերով տեղափոխվել է հիվանդանոց, որտեղ նրան վիրահատել են։ Սակայն նա վիրահատությունից հետո այդպես էլ գիտակցության չի եկել։
«Արմենիա» ԲԿ-ի փոխտնօրեն Արսեն Գրիգորյանը հայտնել է, որ Արթուր Սարգսյանը մարտի 15-ին դիմել է «Արմենիա» բժշկական կենտրոն պորտային օղակված ճողվածքի բարդությամբ։ Նա մի քանի օր առաջ տանը սուր ցավեր է ունեցել, սակայն անտեսել է կամ բարդության աստիճանը չի գիտակցել, իսկ այդ աղիքային անանցանելիությունը, բժշկի խոսքով, բերում է անդառնալի խնդիրների:
Արթուր Սարգսյանը կալանավորվել էր «Սասնա ծռեր» զինված խմբի գործով. նա սննդով բեռնված իր մեքենայով ճեղքել էր իրավապահների պատնեշն ու կրակահերթի տակ մուտք գործել «Սասնա ծռեր» զինված խմբի կողմից գրավված Ոստիկանության պարեկապահակային ծառայության (ՊՊԾ) գնդի տարածք: Նա մեղադրվում էր «Սասնա ծռերին» օժանդակելու մեջ։ Դեկտեմբերի վերջին դատարանը փոխել էր կալանքի որոշումն ու նրան ազատ արձակել։ Մի քանի ամիս անց փետրվարի 9-ին դատարանը կրկին փոխել էր խափանման միջոցն ու երկու ամսով կալանավորել նրան։ Արթուր Սարգսյանը 49 տարեկան էր, մասնագիտությամբ` քանդակագործ, փայտի փորագրող:
