Արաբագետ Սարգիս Գրիգորյանը Sputnik Արմենիային տված հարցազրույցում կարևորում է իրաքյան Քուրդիստանում մեր ներկայությունը։
Ըստ նրա`դուրս մնալ Իրաքյան Քուրդիստանում ընթացող գործընթացներից, նշանակում էր անտեսել այն բուռն զարգացումները, որոնք տեղի էին ունենում Իրաքի քրդաբնակ այս հատվածում:
«Իրաքում մենք ներկայացված ենք դեսպանատան մակարդակով, բայց հյուսիսում, հատկապես, Քուրդիստանի հատվածում, մեր ներկայությունն անհրաժեշտություն էր։
Իրաքը ֆեդերալ պետություն է, որտեղ Քուրդիստանի ռեգիոնալ կառավարությունն առանձին միավոր է, և այնտեղ չունենալ գլխավոր հյուպատոսություն, մասնավորապես, որ մենք համայնք ունենք այնտեղ, մեզ համար բացթողում կլիներ»,-ասում է Սարգիս Գրիգորյանը։
Ըստ արաբագետի` շատ կարևոր է նաև, որ Քուրդիստանի մայրաքաղաք Էրբիլից բացի հյուպատոսության գործառույթների շրջանակն ընդգրկելու է Դոհուկ և Սուլեյմանիա քաղաքները: Քրդաբնակ այդ երեք քաղաքներում ներկայություն ունենալով միայն կարող ենք խոսել Իրաքյան Քուրդիստանի բոլոր հիմնական խաղացողների հետ կապեր ունենալու և դրանք զարգացնելու մասին:
