ԵՐԵՎԱՆ, 16 մարտի — Sputnik. ՀՀ վարչական դատարանի նիստն այսօր անցավ շրջակա միջավայրի պահպանմանն ուղղված կոչերով: Բնապահպաններն ու Գնդեվազ գյուղի բնակիչներն այսպիսով իրենց բողոքն էին արտահայտում Ամուլսարի հանքարդյունաբերական ծրագրի նկատմամբ՝ դատարանից պահանջելով բավարարել իրենց հայցը՝ շրջակա միջավայրի վրա ծրագրի ազդեցության նոր, անկախ փորձաքննություն իրականացնելու վերաբերյալ:
Ինչպես դատարանում նշեց հայցվոր կողմի փաստաբան Հայկ Ալումյանը, հայցի հիմնական նպատակն է փորձաքննության միջոցով պարզել հանքշահագործման ընթացքում կիրառվող քիմիական թունավոր նյութերի հնարավոր բացասական ազդեցությունը շրջակա միջավայրի, մասնավորապես՝ կենդանական ու բուսական աշխարհի առանձին տեսակների, այդ թվում մարդու կերային շղթայի մասը հանդիսացող կենդանիների ու բույսերի, ինչպես նաև քաղցրահամ ջրերի պաշարների վրա։
Լրացուցիչ անկախ փորձաքննություն անցկացնելու վերաբերյալ կարծիք հայտնելու համար պատասխանող կողմը՝ Էներգետիկ ենթակառուցվածքների և բնական պաշարների նախարարության և հանքը շահագործող «Լիդիան» ընկերության ներկայացուցիչները դատարանից լրացուցիչ ժամանակ խնդրեցին։
Դատական նիստը հետաձգվեց ավելի քան 1 ամսով։
