ԵՐԵՎԱՆ, 15 մարտի — Sputnik. «ԵԼՔ» դաշինքից Նիկոլ Փաշինյանն այսօր քարոզարշավ էր իրականացնում Նոր Նորքի երթուղայիններում։ Մոտենալով հասարակական տրանսպորտին՝ Փաշինյանը մարդկանց ասում էր, որ Հայաստանն այս ճգնաժամից ելք կունենա, եթե ապրիլի 2-ին ընտրվի «ԵԼՔ» դաշինքը:
Հասարակական տրանսպորտի ուղևորներին Փաշինյանը հորդորում էր ընտրել համար 1-ը քվեաթերթիկում, որովհետև դա ընտրելով՝ հանրությունը ընտրում է ելքի ճանապարհը: «Թերթի առաջին էջում գրված է՝ Էդմոն Մարուքյան, Արամ Սարգսյան, Նիկոլ Փաշինյան: Մի՛ հուսահատվեք, գլուխներդ բարձր, դուխներդ՝ տեղը, որովհետև ելք կա»,- ասում էր պատգամավորը`դաշինքի բուկլետներն անձամբ բաժանելով կանգառում կանգնածներին, երթուղայինների մեջ։
Նոր նորքի քարոզարշավի ընթացքում նաև միջադեպ գրանցվեց։ Նիկոլ Փաշինյանին արգելում էին մուտք գործել 4-րդ զանգվածի մարզադպրոց («Տորք Անգեղ» մարզամշակութային կենտրոնի)։ Պարզվում է` սպորտդպրոցի միջանցքում՝ մուտքի մոտ «Ծառուկյան» դաշինքի թեկնածու Արթուր Մամոյանի նկարով քարոզչական պաստառն էր, որը դպրոցի տեխնիկական աշխատողները փորձեցին արագ թաքցնել։ Հետո, նրանք, հայհոյանքներ տալով ու սպառնալով, հարձակվեցին լրագրողների և «ԵԼՔ»-ի անդամների վրա:
Ոստիկանությունն արձագանքեց «ԵԼՔ»-ի և լրագրողների հետ տեղի ունեցած միջադեպին, ինչից հետո «Ծառուկյան» դաշինքի թեկնածու Արթուր Մամոյանը հանդիպեց և ներողություն խնդրեց «ԵԼՔ»-ի անդամներից:
Նիկոլ Փաշինյանը կոչ արեց գործել օրինականության սահմաններում:
