ԵՐԵՎԱՆ, 15 մարտի — Sputnik. «Գազպրոմը» նախատեսում է գործարքներ կատարել Հայաստանի Հրազդանի ՋԷԿ-ում արտադրված էլեկտրաէներգիայի միջոցով, լրագրողներին հաղորդել է ընկերության ղեկավար Ալեքսեյ Միլլերը։
«Հայկական կողմը նախատեսում է 2018թ-ին կառուցել բարձրավոլտ էլեկտրահաղորդման գիծը, դա մեզ թույլ է տալիս փոխանակման գործողություններով էլեկտրաէներգիա արտահանել իրանական շուկա», — ասել է Միլլերը։
Միլլերը հաղորդել է նաև, որ «Գազպրոմի» կողմից մշակվել է գազային ոլորտի զարգացման սխեմա մինչև 2030թ-ը։ Փաստաթուղթը ներկայացվել է հանրապետության կառավարությանը, ընկերությունում ակնկալում են, որ դրա քննարկումը կսկսվի այս տարի։
Միլլերը նաև նշել է, որ ընկերությունն ապահովում է Հայաստանի հուսալի գազամատակարարումը` չնայած նրան, որ կապույտ վառելիքը Հայաստան է առաքվում Վրաստանի տարածքով։
