Լաուրա Սարգսյան, Sputnik.
Մնջախաղի հայտնի դերասան, ծաղրածու Լեոնիդ Ենգիբարյանը և ոչ պակաս հայտնի խորհրդային երգչուհի Բելլա Դարբինյանը ծանոթացել են 1960-ական թթ-ի սկզբին, Պրահայում, հյուրախաղերի ժամանակ։ Այդտեղ էլ սկսվել է նրանց սիրավեպը, որն ավելի ուշ վերածվել է մեծ և իսկական ընկերության։ Լեոնիդը նվաճել է Բելլային ոչ միայն իր տաղանդով, այլ նաև բարի սրտով։
Պրահայի հյուրախաղերը
Լեոնիդը սիրում էր կատակներ անել բոլորի հետ։ Նրա հումորը չի շրջանցել նաև Բելլային։ Համերգներից մեկի ժամանակ Բելլան և Լեոնիդը վիճել են, մնջախաղի դերասանը որոշել է կատակել նրա հետ։ Երգչուհին միշտ նյարդայնացել է բեմ դուրս գալուց առաջ։ Իմանալով դա` Լեոնիդը թաքուն մոտեցել է բարձրախոսին և երգի ընթացքում անընդհատ անջատել ու միացրել է այն։
«Մայրս մեծ սթրես է ապրել։ Համերգից հետո մտել է Լեոնիդի մոտ և ասել. «Լյոնյա, նայի՛ր, տե՛ս, դու էլ ես բեմ բարձրանալու ու տես, թե ինչ կլինի քեզ հետ»», — Sputnik Արմենիայի թղթակցի հետ զրույցում ասաց Բելլա Դարբինյանի դուստրը` «Օրակարգ» տեղեկատվական ծառայության համակարգող Թերեզա Կասյանը։
Նույն օրը Ենգիբարյանը վստահ դուրս է եկել Պրահայի բեմ` իր նշանավոր համարով և տապալել այն։ Հերթական անհաջող փորձից հետո Լեոնիդը հեռացել է բեմից։ Այդ դեպքից հետո Լեոնիդը Բելլային վհուկ է անվանել։
Պար` անձրևից հետո
Մի անգամ Բելլան, տեսնելով Ենգիբարյանի պատռված կոշիկները, նրբանկատորեն իմացել է նրա ոտքի համարը և կոշիկ նվիրել Լեոնիդին։
«Մայրս ասել է նրան, որ նա փոքր ոտքեր ունի, իսկ վրդովված Ենգիբարյանը պատասխանել է, որ 42 համարի կոշիկ է հագնում», — պատմեց Կասյանը։
Պրահայում զբոսնելու ժամանակ նրանք մնացել են անձրևի տակ։ Թրջված, սառած մտել են հայտնի բարերից մեկը։ Լեոնիդը Չեխոսլովակիայում ճանաչված և սիրված էր։ Ենգիբարյանին դիմավորել են ծափահարություններով և նրա համար երաժշտություն են միացրել։ Նա երգչուհուն հրավիրել է պարի։ Հաջորդ օրը Բելլան մեկնել է Երևան, իսկ Լեոնիդը հյուրախաղերով մնացել է Պրահայում։ Նա որոշել է ինչ-որ ծանոթի հետ գնալ նույն բարը։
«Լեոնիդին կրկին դիմավորել են ծափահարություններով և միացրել նույն երաժշտությունը, որի տակ նա պարել էր մորս հետ։ Ենգիբարյանը դուրս է եկել դահլիճի կենտրոն, հանել մորս նվիրած կոշիկները, սեղմել դրանք կրծքին ու սկսել պարել», —ասաց Կասյանը։
Այդպես մնջախաղի վարպետը ցույց է տվել Բելլայի նկատմամբ սերն ու կարոտը։
Հանդիպում Երևանում
Անգամ հեռավորությունը չի խանգարել նրանց սիրել միմյանց, Լեոնիդը Մոսկվայում էր, Բելլան` Երևանում։ Սակայն Ենգիբարյանը ժամանակ է գտել և պարբերաբար այցելել նրան։ Ենգիբարյանը Բելլային ամուսնության առաջարկ է արել։
«Երբ Լեոնիդը մայրիկիս ամուսնության առաջարկություն է արել, Բելլան պատմել է դա Զաբել մորաքրոջը։ Նա նայել է մորս և ասել` մեզ միայն ծաղրածուն էր պակաս», — պատմեց Կասյանը։
Կատակով ասված այդ արտահայտությունը, կարծես, կանխորոշել է նրանց հետագա ճակատագիրը. Բելլան և Լեոնիդը մտերիմ ընկերներ են դարձել։ Վերջին անգամ նա եկել էր մորս մահից առաջ։ Նա այցելել է Դարբինյանի նոր տուն, որտեղ նույնիսկ կահույք չի եղել։ Ենգիբարյանը խոստացել է կահույք գնել Բելլայի տան համար։
Բելլա Դարբինյանը ծանր է տարել Լեոնիդի մահը և մինչև կյանքի վերջ ապրել իր սիրելի արտիստի մահվան ցավը սրտում։
