ԵՐԵՎԱՆ, 14 մարտի — Sputnik. Լեռնային Ղարաբաղի խնդրի լուծումը ԼՂ ժողովրդի ինքնորոշման իրավունքի ճանաչումն է։ Այս մասին ասել է Հայաստանի Հանրապետության պաշտպանության նախարար Վիգեն Սարգսյանը Russia Today ռուսական միջազգային հեռուստաալիքին տված հարցազրույցում:
«Ղարաբաղյան հակամարտությանը լուծում գտնելու համար հարկավոր է լիովին հասկանալ հարցի էությունը, որը դարձավ տվյալ հակամարտության հիմքը: Դա Լեռնային Ղարաբաղի ժողովրդի պայքարն է ինքնորոշման համար: Լեռնային Ղարաբաղի խնդրի լուծումը Լեռնային Ղարաբաղի ժողովրդի ինքնորոշման իրավունքի ճանաչումն է՝ պետության ճանաչման միջոցով»,- ասել է Վիգեն Սարգսյանը:
Նա նշել է, որ չնայած ճանաչված չլինելուն՝ Ղարաբաղը կարողացել է ապացուցել, որ անգամ այդ պայմաններում հնարավոր է կառուցել անվտանգության, դատական իշխանության համակարգեր և երկրի կառավարման ժողովրդավարական ինստիտուտներ:
«Եվ ես կարծում եմ, որ առանց այդ իրողությունները լիարժեք հաշվի առնելու՝ Լեռնային Ղարաբաղի խնդրի լուծումը պարզապես անհնար է: Մենք ելնում ենք նրանից, որ գոյություն ունի միջազգայնորեն ամրագրված հրադադարի մասին համաձայնագիր, այն իրավաբանորեն պարտավորեցնող է և անժամկետ: Կնքվել է այն համատեքստում, որ կողմերը՝ Ադրբեջանը, Լեռնային Ղարաբաղը և Հայաստանը, համաձայնել են այդ հակամարտության կարգավորման ուղիները որոնել բացառապես խաղաղ ճանապարհով»,- նշել է նախարարը:
Նա ընդգծել է, որ Վիեննայում և Սանկտ Պետերբուրգում նախագահների մասնակցությամբ կայացած հանդիպումներում ձեռք բերված պայմանավորվածությունների լիարժեք իրագործումը հրամայական է, և շփման գծում մոնիթորինգի, իրավիճակի գնահատման անկախ փորձագիտական մեխանիզմների ստեղծումը վստահության կառուցման կարևոր բաղադրիչ է, իսկ առանց վստահության՝ նման հակամարտությունը պարզապես հնարավոր չէ լուծել:
