ԵՐԵՎԱՆ, 14 մարտի — Sputnik. Հայաստանի նախագահ Սերժ Սարգսյանը ղարաբաղյան հակամարտության խաղաղ լուծմանն այլընտրանք չի տեսնում:
«Պատերազմը խնդրի լուծման ուղի չէ… Հայաստանը ԵԱՀԿ Մինսկի խմբի համանախագահների՝ Ռուսաստանի, ԱՄՆ-ի Ֆրանսիայի հետ միասին կշարունակի ղարաբաղյան հակամարտության բացառապես խաղաղ կարգավորման ուղղությամբ աշխատանքը», — հայտարարել է Սերժ Սարգսյանը՝ ելույթ ունենալով Մոսկվայի միջազգային հարաբերությունների պետական ինստիտուտի ուսանողների և դասախոսների առջև:
Նրա խոսքով՝ Հայաստանը՝ որպես Լեռնային Ղարաբաղի ժողովրդի անվտանգության երաշխավոր, «ստիպված է ջանքեր գործադրել, որպեսզի տարածաշրջանում պահպանի ուժերի հավասարակշռությունը և թույլ չտա նոր թեժացում»:
Միաժամանակ Հայաստանի նախագահը հայտարարել է նոր պատերազմ սանձազերծելու ցանկացած փորձին համարժեք պատասխան տալու պատրաստակամության մասին:
Սարգսյանը ելույթ է ունեցել Մոսկվա կատարած այցի շրջանակում:
Ուսանողների և պրոֆեսորադասախոսական կազմի հետ հանդիպման ժամանակ Հայաստանի նախագահին շնորհվել է ՄՄՀՊԻ պատվավոր դոկտորի կոչում: Ռեկտորը նշել է, որ նախագահի այցն ուսանողների և համալսարանի նկատմամբ մեծ հարգանքի նշան է:
