Գևորգ Հարությունյան, Sputnik
Պետական վկայագիր ունեցող 79 կուսակցություններից 29-ը, այնուամենայնիվ, մասնակցում են հերթական ստուգատեսին: Առանձնակի ակտիվությամբ իր քաղաքական մասնակցությունն է շարունակում անկուսակցականների կուսակցությունը: Ընտրողներից քվե հայցող, որոշ ավանդական ու լավ կազմակերպված դեպքերում էլ տարաբնույթ հնարքներով քվեներ սեփականաշնորհող 9 հավակնորդ թիմերից 4-ը պաշտոնապես կուսակցությունների դաշինքներ են:
Թերևս, այս 9-ից միայն 2-ին` Դաշնակցությանն ու «Հայկական վերածնունդ»-ին դժվարությամբ կարելի է դաշինք համարել: Բանն այն է, որ Հայ Յեղափոխական Դաշնակցության 171 հոգիանոց համապետական ընտրական ցուցակում բացառապես դաշնակցականներ ու համակիր անկուսակցականներ են, իսկ «Հայկական վերածնունդ» կուսակցության 300 հոգանոց ցուցակում բոլորն են կուսակիցներ ու միայն մեկն է անկուսակցական բացառություն: Դե իսկ, ԵԼՔ կուսակցությունների դաշինքը ներկայացրել է «Լուսավոր Հայաստան», «Հանրապետություն», «Քաղաքացիական պայմանագիր» կուսակցությունները:
«Ազատ դեմոկրատների» ցանկում է նաև «Ազատություն» կուսակցությունն ու մեծաթիվ անկուսակցականներ: Կենցաղային հարթությունում միանգամայն հասկանալի, իսկ քաղաքական մակարդակում հակատրամաբանական կերպով, ամենաբազմակուսակցականը «Ծառուկյան» անհատակենտրոն դաշինքն է: Այստեղ համակցվել է 8 կուսակցություն` ԲՀԿ-ն, ՀՀՇ-ն, «Հայազնը», ՄԱԿ-ը, «Ալյանսը», «Առաքելությունը», ՀԱՍԿ-ը, «Համերաշխությունը» ու էլի որոշ անկուսակցականներ:
Կոնգրես —ՀԺԿ դաշինքի 139 անդամանոց կազմում այլ կուսակցականներ չկան, բայց կան անկուսակցականներ: Մինչդեռ Հայաստանի Հանրապետական կուսակցության ոչ դաշինքային ցուցակում ներգրավված են ներկայացուցիչներ նաև «Հզոր Հայրենիք», ՀՔԴՄ, ՄԻԱԿ, ԱՄԿ, ՍԻՄ կուսակցություններից: Հայկոմկուսը, վերջապես, իրագործել է հայ կոմունիստների վաղեմի երազանքը և իր ցուցակում ներառել է նաև «Հայաստանի առաջադիմական միացյալ կոմկուս»-ի անդամների: Բայց կոմունիստները այսքանով չեն բավարարվել ու իրենց շարքերը համալրել են նաև «Կանայք Հայոց Աշխարհի» մեկ ու բազմաթիվ անկուսակցական թեկնածուներով: 148 հոգիանոց Օհանյան-Րաֆֆի-Օսկանյան դաշինքում, «Ժառանգություն»-ն ու «Համախմբումը» միայն մեկական տեղ են տվել «Ժողովրդական» ու «Արդարություն» կուսակցություններին, բայց ներգրավել են 11 անկուսակցականների, որոնցից մեկը գլխավորում է համապետական ընտրացուցակը:
