ԵՐԵՎԱՆ, 13 մարտի — Sputnik. ՀՀ ԱԻՆ ղեկավարի և Կարմիր խաչի միջազգային կոմիտեի (ԿԽՄԿ) պատվիրակության ղեկավարի հանդիպման ընթացքում քննարկվեցին ՀՀ ԱԻՆ-ի և Կարմիր խաչի միջազգային կոմիտեի միջև համագործակցության ուղղությունները, մասնավորապես՝ բնական և մարդածին աղետներից բնակչության խոցելիության նվազեցման և պատրաստվածության բարձրացման ծրագրերը, ինչպես նաև՝ Տավուշի մարզի սահմանամերձ գյուղերում արտակարգ իրավիճակներին բնակչության պատրաստվածությանն ուղղված միջոցառումները:Այս մասին տեղեկացնում է ՀՀ ԱԻՆ լրատվական ծառայությունը։
Կողմերի միջև պայմանավորվածություն ձեռք բերվեց՝ օժանդակել Կարմիր խաչի միջազգային կոմիտեին Տավուշի մարզի սահմանամերձ գյուղերում մանկապարտեզների և դպրոցների համար «ապահով սենյակների» կառուցման չափանիշների համալրման հարցում:
Իր խոսքում նախարար Տոնոյանը կարևորեց սահմանամերձ գյուղերի ԱԻՆ հենակետերում ծառայող փրկարարների ունակությունների ընդլայնումն առաջին բուժօգնության տրամադրման և հագեցման գործընթացում, ինչի համար էլ կազմակերպության հետ պայմանավորվածություն ձեռք բերվեց տեղում կատարելագործման դասընթացներ և գործնական պարապմունքներ կազմակերպելու շուրջ:
Հանդիպման ավարտին կողմերի միջև պայմանավորվածություն ձեռք բերվեց ՀՀ ԱԻՆ-ի և Կարմիր խաչի միջազգային կոմիտեի երևանյան գրասենյակի համատեղ աշխատանքներն իրականացնել տարեկան համագործակցության պլանների ձևաչափով:
