ԵՐԵՎԱՆ, 13 մարտի — Sputnik. Պետդումայի ազգությունների հարցերով հանձնաժողովի նախագահի տեղակալ Ռուսլան Բալբեկն այսօր «ՌԻԱ Նովոստի»-ին հայտնել է, որ Ռուսաստանում կարող է քաղաքացիություն ստանալու նոր սկզբունք սահմանվել:
Դա նախատեսող օրենքի նախագիծն արդեն հավանության է արժանացել ազգությունների հարցերով հանձնաժողովի կողմից:
«Այդ օրենքի ընդունման դեպքում Ռուսաստանի Դաշնության քաղաքացիություն կարող են ստանալ ոչ միայն արյան, ազգության, այլև՝ արմատների սկզբունքով: Հիմնական չափանիշը կլինի ռուսերենի իմացությունը։ Որպես հիմք կարող է ընդունվել նաև Խորհրդային միության և Ռուսական կայսրության տարածքների հետ կապը»,- ասել է Բալբեկը:
Նրա խոսքով` ռուսական քաղաքացիության ձեռքբերման հեշտացված ընթացակարգի իրավունք կստանան ռուսերենին տիրապետողները, ժամանակին ԽՍՀՄ-ի կամ Ռուսական կայսրության կազմի մեջ մտնող հետխորհրդային տարածքի երկրների բնակիչները:
