ԵՐԵՎԱՆ, 13 մարտի — Sputnik. Հայաստանում երեխաները իրենց կարիերայի մասին մտածում են շատ վաղ տարիքից, երբ նրանք վեց ամսական են դառնում։ Այդպես է սկսվում NY Times օնլայն հրատարակության հոդվածը`նվիրված հայկական ատամհատիկ կամ ակռահատիկ կոչված տոնին։
«Agra hadig»-ը կամ ատամհատիկը փոքրիկի կյանքում ուրախալի իրադարձությունը` առաջին ատամի հայտնվելը նշելու ավանդույթն է։
Այդ ծեսի շրջանակում երեխայի առջև դնում են առարկաներ, որոնք խորհրդանշում են տարբեր մասնագիտություններ` միկրոֆոն` արտիստի համար, ստետոսկոպ` բժշկի համար, մկրատ` դերձակի կամ փողեր` բանկիրի համար։ Համարվում է, որ երեխայի ընտրած առաջին առարկայի հետ է կապված նրա ապագա մասնագիտությունը։
«Ատամների հայտնվելուն պես երեխան սկսում է կոշտ ուտելիք ուտել, իսկ այդ հմտության ձեռքբերումը բարենպաստ ժամանակ է համարվում` ապագան կանխատեսելու համար», —հրատարակությունը մեջբերում է ԵՊՀ մշակութաբանության ամբիոնի պրոֆեսոր Յուլիա Անտոնյանի խոսքը։
NY Times-ը գրում է, որ ծնողներն իրենք են ընտրում այն առարկաները, որոնք երեխան պետք է վերցնի` իրենց հայեցողությամբ ավելացնելով կամ հանելով ինչ-որ բան։ Հատուկ պրոֆեսիոնալ առարկաներ վաճառքում չկան։
Անտոնյանը պատմել է, թե ինչպես մի անգամ մի հայր խնդրել է շերեփը հեռու դնել աղջկանից, որպեսզի «փրկի նրան տնային տնտեսուհու ճակատագրից»։
Ինչպես բացատրել է պրոֆեսորը` ծեսի հիմքում ընկած է ատամի և հատիկի միջև կախարդական կապը։ Ավանդաբար երեխայի գլխին ցորեն են լցնում, որը խորհրդանշում է պտղաբերություն և առողջ ատամներ։
«Այսօր ատամհատիկի ժամանակ կարելի է տեսնել ատամի տեսքով քաղցրավենիք և խաղալիքներ, փուչիկներ և այլ առարկաներ, որոնք լայնորեն օգտագործվում են ինչպես Հայաստանում, այնպես էլ հայկական սփյուռքում», — գրում է հրատարակությունը։
Ինչպես նշում է NY Times-ը, 19-րդ դարում երեխայի առջև դրել են միայն երկու առարկա` դանակ և սանր, որպեսզի իմանան ընտանիքիում ապագա երեխայի սեռը։ Եթե նա դանակ էր ընտրում, ապա ծնվելու էր տղա, սանրի դեպքում` աղջիկ։
