ԵՐԵՎԱՆ, 12 մարտի — Sputnik. Բաթումում զանգվածային անկարգություններ են տեղի ունեցել, որոնց հետևանքով տուժել է ավելի քան 20 մարդ: Այս մասին հաղորդում է Sputnik Գրուզիան:
Շաբաթ օրը ոստիկանության աշխատակիցը տուգանել է վարորդին՝ երթևեկության կանոնները խախտելու համար: Ականատեսների խոսքով` ոստիկանը հայհոյել է վարորդին: Տեղացիներն աջակցել են վարորդին` կռվելով իրավապահ մարմինների աշխատակիցների հետ:
Կռիվը վերածվել է զանգվածային բողոքի ակցիայի. ձերբակալություններից հետո Աջարիայի Ներքին գործերի գլխավոր վարչության մոտ հավաքվել է մոտ հազար մարդ` պահանջելով պարեկային ոստիկանության նոր ղեկավար Մալխազ Բաթիաշվիլիի հրաժարականը:
Ինչպես ավելի վաղ հայտնել է «Ռուսթավի 2» հեռուստաալիքը, Հատուկ ուժերի զինվորներն արցունքաբեր գազ և ռետինե փամփուշտներ են կիրառել ցուցարարների դեմ, ովքեր փորձել են ներխուժել Աջարիայի Ներքին գործերի գլխավոր վարչության շենք:
Վրաստանի ներքին գործերի նախարար Գեորգի Մգեբրիշվիլին Բաթումի բնակիչներին խորհուրդ է տվել դուրս չգալ տներից: Մգեբիշվիլիի տեղեկությունների համաձայն` անկարգությունների արդյունքում քաղաքում ձերբակալվել է մոտ 40 մարդ:
Батуми сейчас pic.twitter.com/wFsQcYUwmj
— Oleg Panfilov (@OlegPanfilov7) March 11, 2017
Վրացական ԶԼՄ-ները՝ Առողջապահության նախարարությանը հղում տալով, հաղորդում են 33 տուժածի մասին, որոնցից 15՝ ոստիկանության աշխատակից: Տուժածներից ոմանք վնասվածք են ստացել բութ գործքի հարվածից, ոմանք՝ թունավորվել են արցունքաբեր գազից:
«Վրաստանի տարածքում նմանատիպ քաոսն ու ցանկացած անկարգությունները կճնշվեն ադեկվատ ձևով: Ուզում եմ նշել, որ բոլոր անձինք, ովքեր մասնակցել են անկարգություններին կամ եղել են դրանց կազմակերպիչները, կպատժվեն օրենքի ամբողջ խստությամբ», — ասել է նախարարը:
