Շաբաթվա մարդիկ

Ագատա Բադալյան

1995 թ-ից սովորել է տարբեր բուհերում, բայց կիսատ է թողել, բացի Մաշտոցի համալսարանից, որն ավարտել է 2007 թ-ին: Դիզայներ է: Շուրջ 11 տարի է զբաղվում է պատկերազարդմամբ: Բացի դրանից, լրջորեն զբաղվում է պատկերապատմամբ (comics):

-Միշտ ցանկություն եմ ունեցել մուլտիպլիկատոր լինել, ցավոք, չի ստացվել:

Ապագայում նպատակ ունի մանկական գրքերի համար պատկերազարդումներ անել:

Անահիտ Մուշեղյան

Մասնագիտությամբ մարքեթոլոգ է: Գրեթե 4 տարի է զբաղվում է թվային կոմունիկացիանորով, ինչպես Անահիտն է ասում՝ եթե ավելի թիթիզ՝ digital & social media specialist:

-Միշտ համոզված եմ եղել, որ մի հատուկ առաքելությամբ եմ ծնվել: Մի հազար բան կա, որ մանկուց երազել եմ անել. բժիշկից ու պարուհուց սկսած մինչև շոկոլադի ֆաբրիկայի սեփականատեր: Վերջում կանգ առա մանիպուլյացիայի արվեստի՝ մարքեթինգի վրա:

Ապագայում ցանականում է գաստրոնոմիկ էքպերմենտներ անել սեփական փոքրիկ ռեստորանում:

Աննա Թավաքալյան

2008 թվականից գրում է տարբեր հրատարակությունների համար։ Մասնագիտությամբ լրագրող է։

-Փոքր ժամանակ երազում էի դառնալ բալետի պարուհի, երաժիշտ, դերասանուհի և… զենք վաճառող։ Ապագան միշտ տեսնում եմ պայծառ գույներով։

Երազում է հազար ու մի բանի մասին՝ անընդհատ ու միաժամանակ. մայրանալ, յուրացնել էբռու նկարչական արվեստը, ուսումնասիրել տարբեր կրոններ, ապրել Տիբեթում և «Kill Bill» ֆիլմի հերոսուհու պես տիրապետել արևելյան մարտարվեստներին, գտնել «երազանքի» աշխատանքը, հավաքել տարբեր երկրների սառը զենքերի օրինակներ, երբեք չդադարել երազել…

Բիայնա Մահարի

Մասնագիտությամբ ծրագրավորող է:

Ինչպես ինքն է ասում՝ մոտ մի 8 տարի է զբաղվում է լուսանկարչությամբ:

-Փոքր ժամանակ ուզում էի փողոցները մաքրող լինել (дворник), որ Երևանի փողոցները մաքուր լինեն:

Ցանկանում է զբաղվել այն ամենով, ինչը հաճույքով կանի: Ապագան տեսնում է մաքսիմալ երջանիկ, մաքսիմալ բարի ու մաքսիմալ խաղաղ:

Հերմինե Ստեփանյան

Մասնագիտությամբ թատրոնի և կինոյի դերասան է: 16 տարի է աշխատում է հեռուստատեսությունում, որպես հաղորդավար:

-Երբ փոքր էի, երազում էի տանից փախնելու և ճանապարհորդելու մասին: Կարծում եմ՝ հենց այդ պատճառով է, որ հիմա երազում եմ ինչ-որ ճանապարհորդական հաղորդման հեղինակ լինել:

Հերմինեի ամենամեծ սերը կինոն է, նա ապագան տեսնում է, կամ ինչպես ինքն է ասում՝ ուզում եմ տեսնել կինոյում:

Եվա Թանգյան

Ավարտել է Գեղարվեստի պետական ակադեմիան: Մասնագիտությամբ նկարիչ-մոդելավորող է: 5 տարի է զբաղվում է նորաձևությամբ. հագուստների էսքիզներ է նկարում: Ինչպես ինքն է իր մասին ասում՝ Աշխատում եմ ինքս իմ մոտ որպես Tangian բրենդի կրեատիվ տնօրեն:

-Փոքր ժամանակ չկար կոնկրետ ուղություն, որով ցանկացել եմ զբաղվել: Շատ էի ցանկանում երգել ու պարել, բայց մի օր լսողությունս ստուգեցին, ու հիմա նույնիկ բաղնիքում չեմ երգում: Իսկ պարով զբաղվում եմ մինչև հիմա:

Ապագայում ցանկանում է մեծ ընտանիք ունենալ: Համոզված է, որ գործնականում ամեն ինչ կստացվի, քանի որ աշխատասեր է:

Նաիրա Մուրադյան Գասպարյան

Սովորել է Փանոս Թեռլեմեզյանի անվան գեղարվեստի, այն ժամանակ ուսումնարանի գեղանկարչության բաժնում: 1980-ին կիսատ է թողել:

Շուրջ 37 տարի է զբաղվում է անիմացիայով:

-Միշտ շատ եմ սիրել կենդանիներին ու երբ փոքր էի, ինձ թվում էր, որ բիլոգն այն մարդն է, ով միայն կենդանիներով է զբաղվում: Բայց երբ իմացա, որ այդքան էլ այդպես չէ, փոշմանեցի:

Ապագայում ցանկանում է զբաղվել անիմացիայով ու միայն անիմացիայով: