ԵՐԵՎԱՆ, 11 մարտի — Sputnik. Հայաստանի ԵԱՏՄ-ին անդամակցելը թույլ է տվել մեր երկրում նվազեցնել Ռուսաստանում տնտեսական ճգնաժամի հետևանքով ծնված վնասները, ասաց փոխվարչապետ, Միջազգային տնտեսական ինտեգրման և բարեփոխումների նախարար Վաչե Գաբրիելյանը:
«Եթե չլիներ ԵԱՏՄ-ը, ապա 2015-2016թթ-ին Ռուսաստանի տնտեսական իրադարձություններն ավելի վատ կանդրադառնային Հայաստանի վրա», — ասաց Գաբրիելյանը:
Նրա խոսքով՝ հետազոտությամբ Հայաստանի ցուցանիշները համեմատվել են Վրաստանի ու Մոլդովայի հետ, մասնավորապես, այլ երկրների հետ առևտրի ծավալները: Այդ երկրների տնտեսությունները նման են հայկականին՝ հաշվի առնելով քաղաքացիների թիվը և մեկ անձին բաժին ընկնող ՀՆԱ-ն:
Գաբրիելյանը նշեց, որ արտահանման կտրուկ նվազումից հետո այս երեք երկրներից հենց Հայաստանն է սկսել ավելի արագ վերականգնել այն: Նրա խոսքով՝ հետազոտությունը ցույց է տվել, որ Հայաստանից Ռուսաստան արտահանման վերականգնումն ավելի արագ է սկսվել, քան մյուս երկու երկրներից:
Գաբրիելյանը նշեց, որ Հայաստանի՝ ԵԱՏՄ մտնելուց հետո հայկական բիզնեսն ավելի հեշտ է ընթանում միության երկրներում, հատկապես Ռուսաստանում:
«Որպես տնտեսական միություն՝ ԵԱՏՄ-ը մեծ պոտենցիալ ունի և տնտեսական հարաբերությունների տեսանկյունից այն արդեն արդյունքներ է տալիս», — ասաց Գաբրիելյանը:
