ԵՐԵՎԱՆ, 10 մարտի — Sputnik. Առաջիկայում անհրաժեշտ է սկսել Հայաստանի և Ադրբեջանի միջև բանակցությունները, և Ռուսաստանը կարող է այս հարցում կարևոր դեր խաղալ։ ՌԻԱ Նովոստին հայտնում է, որ այդ մասին հայտարարել է Թուրքիայի նախագահ Ռեջեփ Թայիթ Էրդողանը։
«Հայաստանի և Ադրբեջանի միջև հարաբերություններում առկա լարվածության հարցը շատ կարևոր է։ Կարծում եմ, որ առաջիկայում պետք է այս հարցի շուրջ բանակցություններ սկսել։ Ռուսաստանն այստեղ կարող է կարևոր դեր խաղալ», — ասել է նա Ռուսաստանի և Թուրքիայի միջև բարձրագույն մակարդակի համագործակցության խորհրդի նիստի ընթացքում։
Ղարաբաղյան հակամարտությունը սրվել է 2016 թվականի ապրիլի 2-5–ն ընկած ժամանակահատվածում։ Երևանը հայտարարել էր, որ Ադրբեջանը նախահարձակ գործողություններ է սկսել, Բաքուն էլ իր հերթին հայտարարել էր, որ հայկական կողմն է կրակում Ադրբեջանի ուղղությամբ։ Պաշտոնական տվյալների համաձայն` հակամարտության երկու կողմն էլ զոհեր ունեցան, այդ թվում` խաղաղ բնակիչների շրջանում։
Ապրիլի 5-ին Մոսկվայի աջակցությամբ կողմերը պայմանավորվեցին դադարեցնել ռազմական գործողությունները, սակայն շփման գծում խախտումները շարունակվում են մինչ օրս։ Մայիսի 16-ին Վիեննայում կայացավ Հայաստանի և Ադրբեջանի նախագահներ Սերժ Սարգսյանի և Իլհամ Ալիևի` հակամարտության թեժացումից հետո առաջին հանդիպումը, որին մասնակցեցին նաև ԵԱՀԿ Մինսկի խմբի համանախագահները։
Սարգսյան-Ալիև հանդիպմանը համանախագահող երկրների ներկայացուցիչները պնդեցին 1994թ.–ի զինադադարի և 1995թ.–ի զինադադարի ամրապնդման մասին համաձայնագրերի անշեղ իրագործման անհրաժեշտությունը: Համաձայնություն ձեռք բերվեց քայլեր ձեռնարկել դրանց իրականացման մշտադիտարկման և միջադեպերի հետաքննության մեխանիզմի ներդրման, ԵԱՀԿ գործող նախագահի անձնական ներկայացուցչի թիմի կարողությունների ավելացման, հակամարտության կարգավորման բանակցային գործընթացի հնարավոր վերսկսման ուղղությամբ։
