ԵՐԵՎԱՆ, 10 մարտի — Sputnik. Ղարաբաղյան հակամարտության կարգավորման հարցում Ռուսաստանը կշարունակի համագործակցել ԵԱՀԿ Մինսկի խմբի մյուս երկրների հետ և իր միջնորդական առաքելությունը կշարունակի` հիմնվելով այն դրույթների վրա, որոնք շարադրված են Ռուսաստանի, ԱՄՆ-ի և Ֆրանսիայի նախագահների հինգ համատեղ հայտարարություններում, ասել է ՌԴ ԱԳՆ պաշտոնական ներկայացուցիչ Մարիա Զախարովան։
Ըստ Զախարովայի` այդ փաստաթղթերում ընդգծվում է խնդրի ռազմական լուծման անթույլատրելիությունը, կոչ է արվում Հայաստանի և Ադրբեջանի ղեկավարությանը լուծել վիճելի հարցերը ուժ կամ ուժի սպառնալիք չկիրառելու, պետությունների տարածքային ամբողջականության, իրավահավասարության և ժողովուրդների ինքնորոշման իրավունքի սկզբունքների հիման վրա։
«Եռյակի հետ համաձայնեցված մոտեցումներին զուգահեռ կշարունակվեն ռուսական ինքնուրույն ջանքերը` հաշվի առնելով Հայաստանի և Ադրբեջանի հետ մտերիմ հարաբերությունները, դրանց նախապատմությունը», — ավելացրել է նա։
Զախարովան նշել է, որ Ռուսաստանի անմիջական աջակցությամբ է 1994թ-ի մայիսին ստորագրվել հրադադարի մասին համաձայնագիրը։ Նա հիշեցրել է, որ անցած տարվա ապրիլի սկզբին հենց Ռուսաստանն է որոշիչ դեր խաղացել լայնածավալ ռազմական գործողությունները դադարեցման գործում` Հայաստանի և Ադրբեջանի գլխավոր շտաբների պետերին հրավիրելով Մոսկվա։
