ԵՐԵՎԱՆ, 10 մարտի — Sputnik. Նախագահ Սերժ Սարգսյանը շնորհավորական ուղերձ է հղել Դոնալդ Տուսկին՝ Եվրոպական խորհրդի նախագահի բարձր պաշտոնում վերընտրվելու կապակցությամբ:
«Ջերմորեն շնորհավորում եմ Ձեզ Եվրոպական խորհրդի նախագահի բարձր պաշտոնում վերընտրվելու կապակցությամբ, ինչը հանուն Եվրոպական միության կայուն ապագայի կատարած Ձեր վիթխարի աշխատանքի լավագույն գնահատականն է և Ձեր հանդեպ առկա մեծ վստահության արտահայտությունը»,- նշել է նախագահը։
Նա բարձր է գնահատել Տուսկի նախորդ մանդատի ընթացքում ընթացող անկեղծ, կառուցողական և ջերմ երկխոսությունը, որը, նախագահի խոսքով, լավագույնս ծառայել է Հայաստան-Եվրոպական միություն հարաբերությունների առաջընթացին. շոշափելիորեն խորացել է ոչ միայն Հայաստան-ԵՄ երկկողմ գործակցությունը, այլև համագործակցությունը Արևելյան գործընկերության շրջանակներում։
«Իհարկե, առանձնահատուկ ջերմությամբ եմ հիշում իմ վերջին այցը Բրյուսել, մեր բովանդակային քննարկումները, ինչպես նաև Ձեր սրտաբաց հյուրընկալությունը: Վստահ եմ, որ Հայաստան-ԵՄ նոր շրջանակային համաձայնագրի բանակցությունների ավարտը և հետագայում նրա ուժի մեջ մտնելը նոր էջ կբացեն մեր երկկողմ հարաբերությունների պատմության մեջ՝ որակական նոր մակարդակի բարձրացնելով դրանք»,- նշված է Սարգսյանի ուղերձում։
ՀՀ նախագահի խոսքով` Հայաստանը հաստատակամ է կյանքի կոչելու բոլոր պայմանավորվածությունները, քանզի Եվրոպական միության հետ համագործակցությունը մեծապես նպաստում է Հայաստանում արդյունավետ կառավարման, ժողովրդավարության, մարդու իրավունքների, օրենքի գերակայության և այլ ոլորտներում բարեփոխումների գործընթացին:
«Կրկին շնորհավորելով Ձեզ՝ մաղթում եմ ձեռքբերումներով և հաղթանակներով լի աշխատանքային տարիներ՝ հանուն մեր մեծ տարածաշրջանի՝ Եվրոպայի միասնության ու անվտանգության: Հայաստանը պատրաստ է հնարավորինս նպաստել այդ գործին»,- եզրափակել է նախագահը։
