ԵՐԵՎԱՆ, 8 մարտի — Sputnik. Հայաստանի և Ֆրանսիայի նախագահ Ֆրանսուա Օլանդը և Սերժ Սարգսյանը չորեքշաբթի Փարիզում կայացած բանակցությունների ընթացքում քննարկել են ղարաբաղյան հակամարտությունը, միջազգային ասպարեզում տիրող իրավիճակը և երկկողմ հարաբերությունների զարգացումը։ Այս մասին հայտնում է ՌԻԱ Նովոստին։
«Մենք քաղաքական հարցեր ենք շոշափել, քանի որ Ֆրանսիան կարող է օգտակար լինել, մասնավորապես, ղարաբաղյան հակամարտության կարգավորման հարցում։ ԱՄՆ-ի և Ռուսաստանի հետ Ֆրանսիան Մինսկի խմբի համանախագահ է, մենք ցանկանում ենք հանգել անհրաժեշտ քաղաքական լուծման (ճգնաժամից դուրս գալու համար) և խուսափել ծանր միջադեպերի կրկնությունից, որոնք տեղի են ունեցել անցած շաբաթների և ամիսների ընթացքում։ Մշակել մեխանիզմ, որը թույլ կտա հսկողություն իրականացնել և կանխարգելել խաղաղության դեմ ուղղված գործողությունները», — ասել է Օլանդը Փարիզում Հայաստանի նախագահ Սերժ Սարգսյանի հետ հանդիպման ժամանակ։
Ֆրանսիայի նախագահը նաև բարձր է գնահատել ֆրանսիացի և հայ ժողովուրդների բարեկամական հարաբերությունները, կարևորել ամուր տնտեսական, մշակութային կապերը և համագործակցությունը կրթության ոլորտում։
Հայաստանի նախագահն իր հերթին ընդգծել է երկու երկրների միջև առկա սերտ կապերը։
«Ես հաճույքով կարող եմ փաստել, որ մենք նման մոտեցումներ ունենք մի շարք հարցերի շուրջ, ինչպես երկկողմ համագործակցության ոլորտում, այնպես էլ միջազգային հարցերում, մասնավորապես մեր տարածաշրջանի խնդիրների հարցում», — ասել է Սարգսյանը։
