ԵՐԵՎԱՆ, 8 մարտի — Sputnik. Սոցիալիստական ինտերնացիոնալի պատվիրակները Հայոց ցեղասպանության ճանաչման հարցում համակարծիք են Հայաստանի հետ և պատրաստ են աջակցել «Ինչպես կարող է Թուրքիայի կողմից Հայոց ցեղասպանության ընդունումն ազդել երկու երկրի հաշտեցման վրա» թեմայով կլոր սեղանի կազմակերպմանը։
Բանաձևն ընդունվել է Կոլումբիայի Կարտահեն քաղաքում, Սոցինտերնի 25-րդ համագումարի ժամանակ։ Այդ մասին հաղորդում է The Armenian Weekly հայկական անգլալեզու հրատարակությունը։ Փաստաթղթում հիշատակվում է Հայոց ցեղասպանության թեմայով քննարկումը, որը կայացել է կազմակերպության համագումարի շրջանակում 2015թ-ին Նյու Յորքում։
Սոցինտերնը մտադիր է հետագայում ևս աշխատել հայկական և թուրքական քաղաքական ուժերի հետ` Հայոց ցեղասպանության ճանաչման մասին հարցը քննարկելու և երկու պետություններին հաշտեցնելու համար։ Բանաձևի հեղինակները կոչ են արել համաշխարհային հանրությանն աջակցել ԵԱՀԿ Մինսկի խմբի ջանքերին` Հարավային Կովկասում կայունություն և խաղաղություն հաստատելու համար։
