ԵՐԵՎԱՆ, 7 մարտի — Sputnik. Պոտենցիալ ընտրողների վստահություն և բարձր վարկանիշ` այս մասին է երազում յուրաքանչյուր թեկնածու։ Տեսահոլովակներ, կարգախոսներ, խորհրդանիշեր ու տարբերանշաններ` այս ամենը հոգեբանական տեխնոլոգիաներ են, կարծում է հոգեբանական գիտությունների դոկտոր Սամվել Խուդոյանը։
Նրա խոսքով` այս գործիքակազմը կարող է ինչպես դրական, այնպես էլ բացասական ազդեցություն ունենալ երկրի քաղաքացիների վրա, սակայն այս մեխանիզմները Հայաստանում հաճախ չեն կիրառվում։
«Նախընտրական կարգախոսները հիմնականում խաղաղության, հանգստության, բարիդրացիական հարաբերությունների մասին են։ Սակայն հայ ընտրողին այս ամենը հետաքրքրի չէ։ Ժողովուրդն արդարություն և անվտանգություն է ուզում», — ասաց Խուդոյանը։
Խորհրդանիշերը կարևորագույն, գործուն մեթոդներ են, որոնք քաղաքական գործիչները կիրառում են նախընտրական արշավների ժամանակ։
«Պետք է հաշվի առնել, որ ավելի լավ է կոտրել կարծրատիպերն ու որևէ նոր բան ասել։ Իսկ քաղաքական գործիչներն ամեն անգամ հաճախ նույն բանն են ասում, հատկապես, կոռուպցիայի դեմ պայքարում», — Sputnik Արմենիայի հետ զրույցում նշեց հոգեբանը։
Խուդոյանն օրինակ բերեց ԱՄՆ ընտրությունները։ Նրա խոսքով` Դոնալդ Թրամփի հաղթանակն աննախադեպ էր, ամերիկացիները նույնիսկ պատկերացնել չէին կարող, թե ինչպես կարելի է կրկին Ռուսաստանի հետ բարիդրացիական հարաբերութուններ կառուցել։ Հայաստանում, Խուդոյանի խոսքով, ավելի կարևոր է փոխել հասարակության, ոչ թե քաղաքական գործիչների մտածելակերպը։
Քաղաքացիների և քաղաքական գործիչների միջև եղած անդունդն, ըստ հոգեբանի, ստեղծվում է վստահության պակասից։
«Հայաստանում քաղաքական ուժերի նկատմամբ անվստահությունը բավականին բարձր է։ Կան, իհարկե, նաև այնպիսի մարդիկ, որոնք վստահում են քաղաքական գործիչներին, սակայն դա շատ փոքր տոկոս է կազմում», — նշեց Խուդոյանը։
Նա նաև ավելացրեց, որ ընտրողների մոտ դրական զգացումներ է առաջացրել «Ռեինկարնացիա» հայկական խմբի տեսահոլովակը, որում նկարահանվել է ՀՀ վարչապետ Կարեն Կարապետյանը։ Ընդ որում, շատերն այս տեսահոլովակը քաղաքական PR քայլ են համարում։
