ԵՐԵՎԱՆ, 7 մարտի — Sputnik, Լիլիթ Հարությունյան. Երևանում կայացավ նկարիչ-դիզայներ Լիլիթ Մելիքյանի` հայ արքաների հանդերձանքի աննախադեպ ցուցադրությունը։
Megerian Carpet գորգագործության թանգարանն ու գործարանը ամենատարբեր լսարանի հյուրընկալեց իր հարկի տակ։ Դիզայներ Լիլիթ Մելիքյանի հավաքածուն տեսնելու էին եկել ոչ միայն նորաձևության և դիզայնի սիրահարներն, այլև արվեստը գնահատող ու Հայաստանի պատմությամբ հետաքրքրվող անձինք։
Հայաստանի պատմության և դիցաբանության հետ ֆեշնի յուրօրինակ համադրումը թույլ տվեց հանդիսատեսին հետ գնալ ժամանակի միջով և ընկղմվել հայկական ազնվազարմ դասի շքեղ աշխարհը։
Հյուրերին ներկայացվեցին Երվանդունիների, Արտաշեսյանների, Բագրատունիների, Արշակունիների դինաստիաների թագավորների և թագուհիների, ինչպես նաև կիլիկյան թագավորների կերպարները։ Նրանք բոլորը կարևոր դեր են խաղացել Հայոց պատմության մեջ։ Իսկ հավաքածուն բացեց Վանի թագավորության գլխավոր աստված Խալդը և պտղաբերության աստվածուհի Բագբարտուին։
Բեմի վրա միմյանց հաջորդեցին հին արքայական դինաստիաների ներկայացուցիչները։ Նրանք ստիպեցին պատկերացնել մի տեսարան, որը բազմիցս կարդացել ենք գրքերում։ Հայկական գորգերի առատությունը, համապատասխան երաժշտությունն ու լուսավորությունն ավելի էին խորացնում բեմում կատարվածի միստիկան ու գաղտնիությունը։
Հագուստի հաջորդ խումբը ներկայացրեց «Արա Գեղեցիկ և Շամիրամ» ավանդազրույցի հերոսներ Արա Գեղեցիկ արքայի և նրա կնոջ՝ Նվարդի կերպարները։ Հանդիսատեսը նաև տեսավ, ով ինչ հանդերձանք էր կրում արքայից արքա Տիգրան Մեծը։
Առանձնահատուկ էր Տիգրան Մեծի թագը՝ մարգարտազարդ, ութճառագայթ արևնախշով և երկու կողմից արծվապատկերով:
Վանի թագավորության արքայական հանդերձանքը ներկայացված էր Մենուա առաջինի և նրա կնոջ՝ Թարիրիայի և անպարտելի տիրակալ Արգիշտի առաջինի կերպարներով։
Հավաքածուն եզրափակվեց Կիլիկյան թագավորության արքաների հանդերձանքը ներկայացնող ցուցադրությամբ։ Դրա ստեղծման համար հիմք էին հանդիսացել մետաղադրամներն ու մանրանկարները։
Հավաքածուն յուրատեսակ ձոն է հայոց արքայատոհմերին և նրանց ժառանգությանը:
Լիլիթ Մելիքյանը ոգեշնչվել է Հայոց թագավոր-թագուհիների կերպարներով, նրանց մասին եղած ավանդազրույցներով և պատումներով։
Հագուստի նմուշները ստեղծվել են «Տերյան մշակութային կենտրոնի» վարպետների կողմից:
