ԵՐԵՎԱՆ, 6 մարտի — Sputnik. «Մուրացան» մանկական հիվանդանոցում այսօր անսովոր աշխուժություն էր: Հիվանդանոցում բուժում ստացող երեխաները որոշել են միանալ «Բացիկներ հայ կանանց` վիրավոր զինվորներից» նախաձեռնությանը: Երեխաներն իրենց նկարած բացիկներն ուղարկելու են ապրիլյան պատերազմում վիրավորում ստացած և առ այսօր վերականգնողական բուժում ստացող զինվորներին:
Երևանի պետական բժշկական համալսարանի նախաձեռնությունն այնքան մեծ թափ է ստացել, որ զինվորները միայնակ չեն հասցնում ապահովել խորհրդանշական բացիկների` օրեցօր մեծացող պահանջարկը:
Ակցիային արդեն իրենց աջակցությունն են բերել մի շարք հայտնի մարդիկ, որոնց թվում են նաև Հենրիխ Մխիթարյանը, Լևոն Արոնյանը, Տիգրան Մանսուրյանը: Նախաձեռնության պարտադիր պայմանը, սակայն, մնում է ուժի մեջ: Տոնական բոլոր բացիկներում պետք է լինի զինվորի մասնակցությունը: Նույնիսկ եթե նկարի հեղինակը զինվորը չէ, միևնույն է` բացիկը վերջնական տեսքի է բերվում զինվորի ձեռքով:
Բացիկների վաճառքից ստացված ողջ հասույթը տրամադրվելու է վերականգնողական կենտրոնի վերանորոգմանը, որտեղ երկարատև ու որակյալ բուժում են ստանալու Արցախում վիրավորված զինվորները:
Ակցիայի անսպասելի արձագանքից շոյված հեղինակները որոշել են այն շարունակել մինչև ապրիլի 7-ը:
