ԵՐԵՎԱՆ, 6 մարտի — Sputnik. Լեհաստանի հայերը շատ կարևոր են երկրի համար, երկուշաբթի լրագրողներին ասաց Հայաստանում Լեհաստանի արտակարգ և լիազոր դեսպան Եժի Մարեկ Նովակովսկին։
Նրա խոսքով` Լեհաստանում նշել են հայ համայնքի ստեղծման 650-ամյակը և Հայաստանի հետ դիվանագիտական հարաբերություններ հաստատելու 25-ամյակը։
Ուկրաինայի և Բելառուսի հետ միասին` Հայաստանը և Վրաստանը Լեհաստանի համար ռազմավարական առումով կարևոր երկրներ են։ Վարշավան ցանկանում է այդ պետությունների հետ իրագործել ծրագրեր Արևելյան գործընկերության շրջանակում։
«Մենք կշարունակենք աշխատել Հայաստանի հետ վիզային ռեժիմի ազատականացման ուղղությամբ»,- ասաց դեսպանը` պատասխանելով Sputnik Արմենիայի հարցերին։
Բացի այդ, Նովակովսկու խոսքով` Լեհաստանն այն սակավաթիվ երկրներից է, որը մշտապես զարգացնում է Հայաստանի հետ առևտրային հարաբերությունները։
«Դիվանագիտական կապերի շնորհիվ վերջին 25 տարվա ընթացքում կողմերը կարողացել են կառուցել առևտրատնտեսական հարաբերությունների համակարգ։ Դրան նպաստում են երկու երկրների գործարարների միջև առկա կապերը, որոնց զարգացմանը դեսպանատունն ակտիվորեն աջակցում է»,- ասաց Նովակովսկին։
Հայաստանի ազգային վիճակագրական ծառայության տվյալներով` Հայաստանի և Լեհաստանի ապրանքաշրջանառությունը 2016թ-ին կազմել է 55 մլն դոլար, որը 7 միլիոնով ավելի է, քան 2015թ-ին։ 2016-ին այն կազմել է Հայաստանի ընդհանուր արտաքին առևտրի 1,1 տոկոսը։
