ԵՐԵՎԱՆ, 6 մարտի — Sputnik. Այսօր` մարտի 6-ին, տեղական ժամանակով ժամը 10:24-ին, Քարվաճառ քաղաքից 28 կմ դեպի հյուսիս-արևելք հատվածում, 10 կմ խորությամբ տեղի է ունեցել երկրաշարժ՝ 3.4 մագնիտուդ հզորությամբ: Արցախի Հանրապետության վարչապետի մամուլի քարտուղար Արտակ Բեգլարյանն այս կապակցությամբ գրառում է կատարել Ֆեյսբուք սոցիալական ցանցում։
«Տեղեկացնեմ, որ երկրաշարժի հետևանքով մարդկային կորուստներ և ավերածություններ չկան, ճանապարհները նույնպես չեն վնասվել: Միայն էպիկենտրոնին մոտիկ մի քանի գյուղում գրանցվել են որոշ փոքր վնասներ, մասնավորապես՝ պատերի ճեղքերի առաջացում կամ խորացում»,- գրել է Բեգլարյանը:
Նրա խոսքով` Արցախում իրավիճակը հանգիստ է, խուճապային տրամադրություններ չկան բնակչության մոտ: