ԵՐԵՎԱՆ, 5 մարտի — Sputnik, Արմենուհի Մխոյան. Բաբկենը տարիներ առաջ տեսել էր, որ հասակակից տղաները զինվորականի պես են հագնվում ու շարային վարժություններ են անում, և այդ ժամանակից զինվորական հագուստն ու քայլքը երազանք էին դարձել տղայի համար: Հիմա արդեն, երբ 15 տարեկան է, Բաբկենը՝ զինվորական հագուստը հագին, քայլում է պատանի երկրապահների շարքում:
«Երբ ժամանակը գա, հայրենիքս եմ պաշտպանելու, հիմա դեռ կարգ ու կանոնին եմ ընտելանում,- ասում է Բաբկեն Սարգսյանը, ապա ավելացնում,- մեր սպարապետի պես խիզախ եմ ուզում լինել ու կռվել իմանալ»:
Բաբկենը մարտի 5-ին՝ ՀՀ պաշտպանության նախկին նախարար Վազգեն Սարգսյանի ծննդյան օրը, ավելի քան 200 պատանիների ու աղջիկների հետ Գյումրու Կենտրոնական հրապարակում ի լուր բոլորի երդվեց՝ շարունակել Վազգեն Սարգսյանի գործը, լինել հայրենասեր ու քաջ:
Գյումրիում, Վարդանանց արձանախմբի հարևանությամբ պատանիները ծնկեցին ու երդվեցին, իսկ նրանց երդման արարողությանը հուզմունքով հետևեցին ծնողները, հրամանատարներն ու Երկրապահ կամավորների միության «Կումայրի» ջոկատի անդամները՝ նրանք, ովքեր մարտական մեծ ճանապարհ են անցել՝ Միքայել Վարդանյանի հրամանատարությամբ՝ Լաչին, Շուշի, Հորադիս, Հադրութ… Ջոկատի տղաները վստահ են՝ այսօրվա սերունդը շատ լավն է. 2016 թվականի ապրիլը՝ դրա ապացույցը:
Գյումրու զինվորական կոմիսար, գնդապետ Գագիկ Խաչատրյանն էլ նշեց, որ այսօրվա սերնդի հետ մեծ հույսեր է կապում:
«Այս երեխաները ապրում են սրանով, ու նրանք են մեր վաղվա օրը, եթե նրանց նույնիսկ 10 տոկոսը զարգացնի այն գիտելիքը, որ ստանում է այսօր, իմացեք՝ մենք խնդիր չենք ունենա: Սա հայրենասիրական մեծ դպրոց է»,- նշեց Գագիկ Խաչատրյանը:
Հայաստանի Հանրապետության պաշտպանության նախկին նախարար, վարչապետ Վազգեն Սարգսյանը մարտի 5-ին կդառնար 58 տարեկան: 1990-1992 թթ.-ին նա «Երկրապահ» կամավորական ջոկատների հրամանատարն էր: 1991-ին դարձավ Հայաստանի Հանրապետության առաջին պաշտպանության նախարարը, իսկ 1999-ի հունիսից Հայաստանի Հանրապետության վարչապետն էր։
Վազգեն Սարգսյանը սպանվել է 1999թ․-ի հոկտեմբերի 27-ին ՀՀ Ազգային ժողովի նիստերի դահլիճում տեղի ունեցած ոճրագործության հետևանքով:
