ԵՐԵՎԱՆ, 5 մարտի — Sputnik. Հայաստանի Հանրային հեռուստաընկերությունը նախընտրական քարոզարշավի համար կուսակցություններին և դաշինքներին կտրամադրի 60 անվճար և 120 վճարովի րոպե, իսկ Հանրային ռադիոն` 120 անվճար և 180 վճարովի րոպե:
Մարտի 5-ից սկսած՝ նախընտրական քարոզարշավը Հայաստանի Հանրային հեռուստաընկերության եթերում կմեկնարկի ժամը 19:00-ին: Հանրային ռադիոյի եթերում այն կհեռարձակվի երկու տարբեր ժամերի. 13:30-ից (անվճար եթերը) և 21:40-ից (վճարովի):
Հանրային հեռուստաընկերության եթերում մարտի 5-ին առաջինն իր անվճար նախընտրական քարոզարշավը կանցկացնի «Ելք» դաշինքը, իսկ քարոզարշավի վերջին օրը` մարտի 31-ին, ելույթ կունենա «Ծառուկյան» դաշինքը:
Մարտի 5-ից մեկնարկող քարոզարշավը կտևի 27 օր, ապրիլի 1-ը լռության օր է, իսկ ապրիլի 2-ին տեղի կունենա քվեարկությունը։ Ոստիկանության տվյալով՝ ընտրելու իրավունք ունի 2 մլն 564 հազար 334 մարդ:
