ԵՐԵՎԱՆ, 4 մարտի — Sputnik. Երևանի պետական բժշկական համալսարանը ակցիա է նախաձեռնել, որի շրջանակում զինվորական ծառայության ժամանակ վիրավորված զինծառայողները մարտի 8-յան տոնական բացիկներ են պատրաստում։ Որոշ պետական կառույցներ ու հայտնի մարդիկ արդեն հայտնել են, որ պատրաստ են գնել այդ բացիկները։ Նրանց է միացել նաև կոմպոզիտոր, ՀՀ արվեստի վաստակավոր գործիչ, ՀՀ ժողովրդական արտիստ Տիգրան Մանսուրյանը:
Հայտնի կոմպոզիտորը հենց այդ բացիկներով է շնորհավորելու իր հարազատների տոնը:
Բժշկական համալսարանի ռեկտոր Արմեն Մուրադյանի «Բացիկներ հայ կանանց` վիրավոր զինվորներից» նախաձեռնությունը մեծ արձագանք է ստացել, բացիկներ գնելու ցանկություն են հայտնել նաև հայտնի ֆուտբոլիստ Հենրիխ Մխիթարյանն ու գրոսմայստեր Լևոն Արոնյանը:
Բացիկների վաճառքից ստացված ողջ հասույթը տրամադրվելու է վիրավոր զինվորների վերականգնողական կենտրոնի վերանորոգմանը:
Նախաձեռնությանը միանալու մասին հայտնել է նաև երգիչ Հայկոն. այդ մասին նա գրել է իր ֆեյսբուքյան էջում:
