ԵՐԵՎԱՆ, 4 մարտի — Sputnik. Ադրբեջանի գլխավոր դատախազությունը «անօրինական» տնտեսական գործունեություն ծավալելու, մեծ չափերի վնաս հասցնելու և «անօրինական» եկամուտ ստանալու փաստով քրեական գործ է հարուցել և քննությունն է անցկացնում Շվեյցարիայի, Բուլղարիայի, Ուրուգվայի, Արգենտինայի, Ռումինիայի այն ընկերությունների նկատմամբ, որոնք գործունեություն են իրականացնում Արցախում:
Այս մասին հայտնում են ԶԼՄ-ները՝ հղում անելով ադրբեջանական դատախազությանը:
Ադրբեջանի դժգոհությունն առաջացրած ընկերությունների թվում են Haik Watch and Jewelry Co-ն, Rodino Haskovo JIC-ն, Centro Ceibal-ը, Deccan Gold Mines Ltd-ն և Cosmote Romanian Mobile Telecommunications S.A-ն::
Ավելի վաղ Ադրբեջանը Ինտերպոլի միջոցով փորձել էր հետախուզում հայտարարել այն եվրապատգամավորների նկատմամբ, որոնք ներկա էին եղել Արցախում անցկացված հանրաքվեին: Փորձել էր նաև պատասխանատվության ենթարկել Ազոխի քարանձավում պեղումներ անցկացրած եվրոպացի հնագետներին: Սակայն Ինտերպոլը մերժել էր Ադրբեջանի՝ միջազգային հետախուզում հայտարարելու դիմումը:
